فوتو: Kursiv.kz

قر ۇلتتىق بانكى «Delta Bank» اق-تى بانكتىك جانە وزگە دە وپەراتسيالاردى جانە باعالى قاعازدار نارىعىندا قىزمەتتى جۇرگىزۋگە بەرىلگەن ليتسەنزيادان ايىرۋ تۋرالى شەشىم قابىلدادى. بۇل تۋرالى بانكتىڭ فەيسبۋكتەگى پاراقشاسىندا جازىلدى. 

«قازاقستان رەسپۋبليكاسى ۇلتتىق بانكى توراعاسىنىڭ 2017 جىلعى 2 قاراشاداعى №402 بۇيرىعىمەن ۋاقىتشا اكىمشىلىك تاعايىندالدى، وعان بانكتى باسقارۋدىڭ بارلىق ورگاندارىنىڭ وكىلەتتىكتەرى ءوتتى. ۋاقىتشا اكىمشىلىك سوت تاراتۋ كوميسسياسىن تاعايىنداعانعا دەيىن جۇمىس ىستەيتىن بولادى»، - دەلىنگەن حابارلامادا

باس بانكتىڭ مالىمەتىنشە، 2017 جىلعى 3 قاراشادان باستاپ ۋاكىلەتتى ورگاننىڭ نورماتيۆتىك قۇقىقتىق اكتىلەرىندە كوزدەلگەن شىعىستارعا، بانككە كەلىپ تۇسەتىن اقشانى ەسەپتەۋگە بايلانىستى جاعدايلاردى قوسپاعاندا، كليەنتتەردىڭ جانە بانكتىڭ بانك شوتتارى بويىنشا بارلىق وپەراتسيالار توقتاتىلدى.

قازاقستان رەسپۋبليكاسىنىڭ ۇلتتىق بانكى زاڭنامادا بەلگىلەنگەن تارتىپپەن بانكتىڭ قىزمەتىن ماجبۇرلەپ توقتاتۋ (تاراتۋ) تۋرالى سوتقا ءوتىنىش جاسايدى.
سوت بانكتى ماجبۇرلەپ تاراتۋ تۋرالى ءىس قوزعاعان كۇننەن باستاپ بانكتى ۇستاپ تۇرۋعا اعىمداعى شىعىستارعا بايلانىستى تالاپتاردى قوسپاعاندا، كرەديتورلاردىڭ بانككە تالاپتارى تەك تاراتۋ وندىرىسىندە عانا ۇسىنىلۋى مۇمكىن.

ال بانك جەكە تۇلعالاردىڭ دەپوزيتتەرىنە مىندەتتى كەپىلدىك بەرۋ جۇيەسىنىڭ قاتىسۋشىسى بولىپ تابىلادى. تەڭگەدەگى جانە شەتەل ۆاليۋتاسىنداعى دەپوزيتتەر، تولەم كارتوچكالارىنداعى جانە بانك شوتتارىنداعى اقشا «قازاقستاننىڭ دەپوزيتتەرگە كەپىلدىك بەرۋ قورى» اق-تىڭ كەپىلدىگىمەن قورعالعان.

كەپىلدىكتىڭ ەڭ كوپ شەگى تەڭگەدەگى دەپوزيتتەر بويىنشا 10 ملن تەڭگە، شەتەل ۆاليۋتاسىنداعى دەپوزيتتەر بويىنشا 5 ملن تەڭگە. وسىعان وراي دەپوزيتورلارعا بەلگىلەنگەن تارتىپپەن كەپىلدىك وتەمى تولەنەتىن بولادى.

“The Qazaq Times”