قازاقستاندا ەڭ ءىرى جىلىجاي كەشەنى وسى جىلدىڭ جارتى جىلىندا 4 مىڭ تونناعا جۋىق ءونىم الدى. گەكتارىنا 300-350 تسەنتنەردەن ءونىم الىپ وتىرعان «ادەليا» جىلىجايى 16 گەكتار جەرگە قىزىناق پەن قيار ەگىپ، جىلىنا ەكى رەت ءونىم العان، دەپ حابارلايدى وقو اكىمدىگىنىڭ ءباسپاسوز قىزمەتى. جىلىجاي ورداباسى اۋدانى، بادام اۋىلىندا ورنالاسقان.

جىلىجايدا فرانتسۋز كومپانياسىنىڭ زاماناۋي قوندىرعىلارى ورناتىلعان. مۇندا جىلىتۋدان باستاپ تامشىلاتىپ سۋارۋعا دەيىنگى بارلىق پروتسەسس كومپيۋتەرمەن باقىلانادى.

كاسىپكەرلەردىڭ ايتۋىنشا، مۇنداعى وسىرىلەتىن كوكونىستەر ەكولوگيالىق تازا ءونىم. ولاردى وسىرۋدە قولدانىلاتىن تەحنولوگيا سۋ مەن تىڭايتقىشتاردى جانە باسقا دا رەسۋرستاردى ۇنەمدەۋگە مۇمكىندىك بەرەدى. جينالعان ءونىمنىڭ باسىم بولىگى رەسەيگە ەكسپورتتالسا، قالعانى قازاقستاننىڭ الماتى، استانا قالالارىنا جىبەرىلەدى.

جوبانى «قازاگروقارجى» اكتسيونەرلىك قوعامى قارجىلاندىرعان. اتالمىش ۇيىم 2011 جىلى 440 ميلليون تەڭگە كولەمىندە جەڭىلدەتىلگەن نەسيە بەرسە، 2013 جىلى 2,2 ميلليارد تەڭگە كولەمىندە قارجى بولگەن.

جالپى وبلىس اۋماعىنداعى جىلىجايدىڭ جالپى كولەمى 900 گەكتاردان اسادى. بۇل - قازاقستانداعى جىلىجاي شارۋاشىلىعىنىڭ شامامەن 80 پايىزىن قۇراپ وتىر.

“The Qazaq Times”