يسلام ءتۋريزمى ارتىپ كەلەدى

الداعى جىلدارى بۇكىل الەمدەگى جاس مۇسىلمانداردىڭ ساياحاتقا جۇمسايتىن قارجىسى ەكى ەسەگە ۇلعايادى.  HalalTrip جانە Mastercard كومپانيالارىنىڭ بىرلەسىپ جۇرگىزگەن زەرتتەۋلەرىنىڭ ناتيجەسىندە  يسلام ءتۋريزمى جاقىن بولاشاقتا 300 ملرد دوللار پايدا اكەلەتىنى انىقتالعان. بۇل تۋرالى APF اقپاراتتىق اگەنتتىگى جازدى. 

مۇسىلمانداردىڭ تۋريست اتانۋىنىڭ جيىلەۋى حالال يندۋسترياسىنىڭ كۇرت دامۋىنا اكەلەدى. سونىمەن الداعى ۋاقىتتا حالال ستاندارتتارىنا ساي قىزمەت كورسەتەتىن مەيرامحانا، قوناق ۇيلەر مەن دۇكەندەردىڭ سانى ارتۋى مۇمكىن.

مۇسىلمان جانۇيالار ادەتتە وتباسىنىڭ بۇكىل مۇشەلەرىمەن جىلىنا ءبىر رەت وزگە ەلدە دەمالىس ۇيىمداستىرادى. بىراق سوڭعى كەزدەرى 20-36 جاس ارالىعىنداعى مۇسىلمان جاستار  بىلىم، عىلىم ىزدەپ، جۇمىس نە وزگە دە قىزىعۋشىلىقتارى بويىنشا شەت ەلگە جىلىنا بىرنەشە رەت شىعادى. تابىس تابۋدى كوزدەگەن كومپانيالاردىڭ نەگىزگى ارقا سۇيەيتىن اۋديتورياسى دا - وسىلار.

2016 جىلى تۋريزمدەگى يسلام ءدىنى وكىلدەرىنىڭ سەگمەنتى 156 ملرد $  بولسا، ونىڭ 55 ملرد $  شىعىنى - جاستارعا تيەسىلى. ساراپشى ماماندار 2024 جىلعا قاراي بۇل كورسەتكىش 100 ملرد دوللارعا دەيىن ارتاتىنىن ايتادى.

“The Qazaq Times”