ليبەرالدى كورەيا پارتياسىنىڭ جەتەكشىسى ۋاشينگتوندا. فوتو: WSJ.

وڭتۇستىك كورەيانىڭ كونسەرۆاتيۆتى وپپوزيتسيالىق پارتياسى ترامپ ۇكىمەتىن وڭتۇستىك كورەيادا تاكتيكالىق يادرولىق قارۋدى قايتا ورنالاستىرۋعا ىنتالاندىرۋدا. سولتۇستىك كورەيانىڭ قاۋىپ-قاتەرىن تولىقتاي باعالاۋعا جانە كورەي تۇبەگىندەگى جاعدايدى وزگەرتۋگە كومەكتەسۋ ءۇشىن وڭتۇستىك كورەيانى يادرولىق قارۋمەن قامتاماسىز ەتۋى كەرەك دەپ وتىر. بۇل تۋرالى «WSJ» باسىلىمى حابارلادى.

ەلدىڭ «ليبەرالدى كورەيا» پارتياسىنىڭ جەتەكشىسى حوڭ ءجۇنپيو (Hong Joon-pyo) اقش مەملەكەتتىك دەپارتامەنتىنىڭ جوعارى لاۋازىمدى تۇلعالارىمەن جانە ۋاشينگتونداعى ەكىجاقتى پارلامەنت وكىلدەرىنىڭ كەزدەسۋى كەزىندە اقش-تىڭ قارۋ-جاراقپەن قامتاماسىز ەتۋىن ءۇمىت ەتەتىندىگىن اشىق ايتتى. دەگەنمەن، وڭتۇستىك كورەيانىڭ قازىرگى پرەزيدەنتى ءمۇن جا-ين يادرولىق قارۋدى تاراتۋعا قارسى. ول بۇل تۋرالى جاساعان مالىمەتىندە وڭتۇستىك كورەيانىڭ تاكتيكالىق يادرولىق قارۋلاردى ەل ىشىنە ەنگىزۋى، كورەي تۇبەگىندە يادرولىق سوعىستىڭ بولۋىنا تىكەلەي سەبەبى بولاتىنىن ايتقان.

«ليبەرالدى كورەيا» پارتياسىنىڭ جەتەكشىسى سولتۇستىك كورەياعا قارسى ايتقان باتىل دا قاتاڭ پىكىرلەرى ءۇشىن وڭتۇستىك كورەيادا حالىقتىق قولداۋعا يە بولىپ وتىر. ول ءمۇن جا-ينمەن قاتار پرەزيدەنت سايلاۋىنا تۇسكەن جانە داۋىس سانى بويىنشا ەكىنشى ورىنعا يە بولعان ساياسي تۇلعا. الايدا سول رەتكى سايلاۋدا ءمۇن جا-ءيننىڭ ءباسى باسىم ءتۇسىپ، 9 جىلدان كەيىن العاش رەت كونسەرۆاتيۆتى پرەزيدەنت بولىپ بيلىككە كەلدى.

اقش ۇكىمەتىنىڭ وكىلدەرى جاساعان مالىمدەمەدە، ترامپ ۇكىمەتى وڭتۇستىك كورەيالىق شەنەۋنىكتەر ايتقان ۇسىنىستى قاراستىرىپ كورۋگە دايىن ەكەنىن جەتكىزگەن. اقش-تىڭ قورعانىس ءمينيسترى جيم مەتتيس قىركۇيەك ايى كەزىندە وڭتۇستىك كورەياداعى ساپارى كەزىندە جۋرناليستەرگە جاۋاپ بەرىپ، وڭتۇستىك كورەيادا تاكتيكالىق يادرولىق قارۋلاردى قايتالاي ورنالاستىرۋدىڭ مۇمكىن ەكەنىن ايتقان ەدى. دەگەنمەن، بۇل جولى مەتتيس وڭتۇستىك كورەيانىڭ ۇسىنىسىنا جاۋاپ قايتارعان جوق.

ۋاشينگتوننىڭ وكىلى سارسەنبىدە اقش-تىڭ پوزيتسياسى وزگەرمەگەنىن، ءالى كۇنگە دەيىن كورەي تۇبەگىنىڭ يادرولىق قارۋسىزدانۋىن قولداپ كەلە جاتقانىن مالىمدەدى.

“The Qazaq Times”