فوتو: mignews.ru

بۇگىن بۇۇ-نىڭ قاۋىپسىزدىك كەڭەسى سۇرياداعى حيميالىق قارۋ قولدانىسىنا قاتىستى زەرتتەۋدى كەڭەيتىلگەن دەڭگەيدە جۇرگىزۋگە بايلانىستى ۇسىنىستى داۋىسقا سالادى. ساراپشىلاردىڭ ايتۋىنشا، باشار اساد ۇكىمەتىنىڭ قولداۋشىسى رەسەي بۇل رەزوليۋتسياعا ۆەتو قويۋى مۇمكىن. بۇل تۋرالى APF اقپاراتتىق اگەنتتىگى جازدى. 

وتكەن ايدا بۇۇ-نىڭ سوعىس بارىسىندا  جاسالعان قىلمىس بويىنشا زەرتتەۋشىلەرى "حان-شەيحۋندا بولعان  شابۋىلدىڭ ارتىندا ءسۇريا اسكەرى تۇر" دەگەن مالىمدەمە جاساعان بولاتىن. داماسك بۇل ايىپتاۋلاردى جوققا شىعاردى.  ۇلىبريتانيا، فرانتسيا جانە اقش باشار اساد ۇكىمەتىن وپپوزيتسيا بەكىنگەن اۋىلعا قارسى قارۋ قولدانۋ فاكتىسىنە كىنالاپ وتىر. بۇل شابۋىل بارىسىندا 87 بەيبىت تۇرعىن، ونىڭ ىشىندە 30 بالا قازا تاپقان بولاتىن.

وسىعان دەيىن ءسۇريا باسشىلىعىنىڭ 2014-2015 جىلدارى 3 اۋىلدا حيميالىق قارۋ قولدانعانى بەلگىلى بولعان ەدى. وسىعان وراي اقش، ۇلبىريتانيا مەن فرانتسيانىڭ اقپان ايىندا ءسۇريانىڭ وكىلەتتى تۇلعالارىنا قارسى سانكتسيا ەنگىزۋ تۋرالى شەشىمىنە رەسەي مەن قىتاي ۆەتو قويىپ تاستادى.

رەسەي تاراپىنان ميحايل ۋليانوۆ حان-شەيحۋنداعى ۋلى گاز شابۋىلى ءسۇريانىڭ اۋە كۇشتەرىنەن ەمەس، جەرگە تاستالعان جارىلعىش زاتتان بولۋى مۇمكىن دەگەن بولجام ايتىپ، رەسەي ناقتى شەشىم قابىلداۋ ءۇشىن بارلىق دالەلدەردى مۇقيات قاراپ شىعۋى كەرەك دەگەن بولاتىن. اقش-تىڭ بۇۇ-داعى وكىلى نيككي حەيلي حان-شەيحۋندا حيميالىق قارۋ قولدانىلعانى تۋرالى 60 ءتۇرلى نۇسقا بار ەكەنىن ايتىپ: "بۇۇ-نىڭ قاۋىپسىزدىك كەڭەسىندە بار مەملەكەت، نە ۇيىمعا مۇلدە كىرمەيتىن مەملەكەت بولسىن، ول جەردە حيميالىق قارۋدىڭ قولدانىلۋى الەم تاراپىنان  قاتاڭ سىنالۋ كەرەك", - دەپ ەسكەرتتى.

“The Qazaq Times”