فوتو: versiya.info

ساقتاندىرۋ كومپانيالارىنىڭ سوڭعى بولعان حارۆي، يرما جانە ماريا داۋىلدارى مەن مەكسيكاداعى ەكى جەر سىلكىنىسىنىڭ سالدارىن جويۋعا جۇمساعان قارجىسى 95 ملرد $ باعالاندى. مۇنداي ەسەپتى ۇسىنعان شۆەيتساريالىق Swiss Re ساقتاندىرۋ كومپانياسى ءوز شىعىنى 3,6 ملرد $ جۋىقتايتىنىن حابارلادى. بۇل تۋرالى APF اقپاراتتىق اگەنتتىگى جازدى. 

حارۆي داۋىلى تامىز ايىنىڭ سوڭىندا تەحاس پەن لۋيزيانانىڭ ءبىر بولىگىنە ايتارلىقتاي شىعىن كەلتىرىپ، حيۋستون قالاسىن سۋ باسۋىنا سەبەپكەر بولدى. قىركۇيەك ايىندا  يرما داۋىلى فلوريداعا، ال ماريا داۋىلى پۋەرتو-ريكوعا جەتتى. ءدال وسى ۋاقىتتا مەكسيكادا ءىرى جەر سىلكىنىسى بولىپ، كوپتەگەن ادامدار قازا تاپتى.

ساقتاندىرۋ كومپانيالارى تابيعي اپاتتاردىڭ سالدارىن وتە ۇلكەنگە بالاپ وتىر. ولار داۋىل مەن جەر سىلكىنىسىنەن زارداپ شەككەن كومپانيا تۇتىنۋشىلارىنىڭ ماسەلەسىن ءبىرىنشى كەزەكتە قاراستىرىپ، كەلىسىمشارتقا سايكەس شارالار قابىلدايتىنىن جەتكىزدى.

“The Qazaq Times”