بۇعان دەيىن دە ەكى ەل اراسىندا شەكارالىق كەلىسىمدەر جۇزەگە اسقان. فوتو:blogs.tribune.com.pk.

پاكىستاننىڭ گاۋدەر پورتىندا وتكەن ەكىجاقتى ورتاق شەكارا كوميسسياسىنىڭ وتىرىسىندا يران مەن پاكىستان اراسىندا شەكارا-قاۋىپسىزدىك كەلىسىمىنە قول جەتكىزگەن. بۇل تۋرالى «پارس-اقپارات» اگەنتتىگى مەن «اناتولى» اقپارات اگەنتتىكتەرى حابارلادى.

ەكى ەلدىڭ شەكارا قاۋىپسىزدىك جونىندە ارنايى كوميسسياسىنىڭ 21-ءشى رەتكى ءماجىلىسى گاۋدەر پورتىندا وتكىزىلدى. كەزدەسۋ وتىرىسىندا ەكى ەلگە ورتاق شەكارالار، شەكارا قاۋىپسىزدىگى، كوشى-قون جانە ساۋدا-ساتتىق تاقىرىپتارى قاراستىرىلدى. ناتيجەسىندە شەكارا اتتاعان ەسىرتكى ساۋداسى مەن تەرروريزم جانە زاڭسىز كوشى-قونعا بىرلەسە كۇرەس جۇرگىزۋ جونىندە ورتاق مامىلەگە كەلگەن.

كەلىسىم بويىنشا، پاكىستان مەن يران يسلام رەسپۋبليكاسى اراسىندا شەكارا قاۋىپسىزدىگىن ورتاق قورعاۋ، تەرروريزم جانە ەسىرتكى ساۋداسىنا بىرلەسە كۇرەس جۇرگىزۋ تۋرالى ىنتىماقتاستىق جاساستى. ءارى ەكى تاراپتىڭ شەكارالىق ساۋدا-ساتتىق ىستەرىن كەدەرگىسىز جۇرگىزۋ تۋرالى ارنايى باعدارلامالار قابىلداندى.

“The Qazaq Times”