اۋستريادا پارلامەنتتىك سايلاۋ اياقتالدى

اۋتستريادا پارلامەنتتىك سايلاۋ اياقتالدى. ازاماتتارى 16 جاستان باستاپ داۋىس بەرۋ قۇقىعىنا يە مەملەكەتتە سايلاۋعا 8,7 ملن حالىقتىڭ 6,4 ملن قاتىستى. سايلاۋ قورىتىندىلارى تولىق بەلگىلى بولماسا دا، ونىڭ العاشقى ناتيجەلەرى مەن جەڭىمپازدار تۋرالى بولجامدار جارىق كورىپ ۇلگەردى. بۇل تۋرالى ءال-جازيرا اقپاراتتىق اگەنتتىگى جازدى. 

الدىن-الا بولجامدار بويىنشا، 31 جاستاعى سەباستيان كۋرتس باسقاراتىن كونسەرۆاتيۆتى حالىقتىق پارتيا 31,5 پايىز داۋىسپەن الدىڭعى ورىندا تۇر. ونان كەيىنگى كەزەككە 27,1 پايىز داۋىسپەن سوتسيال-دەموكراتيالىق پارتيا تۇراقتاسا، وڭ قاناتتاعى ەركىندىك پارتياسى - ءۇشىنشى ورىندا.

اۋسترياداعى پارلامەنتتىك سايلاۋ مەرزىمىنەن ءبىر جىل بۇرىن وتكىزىلدى. وعان سەبەپ - كونسەرۆاتيۆتى حالىقتىق پارتيا مەن سوتسيال-دەموكراتيالىق پارتيا وداعىنىڭ ىدىراۋى. ەندى ساراپشىلاردىڭ پىكىرىنشە، جاڭا وداقتاس بايلانىستار كونسەرۆاتيۆتى حالىقتىق پارتيا مەن ەركىندىك پارتياسى اراسىندا ورنايدى.

“The Qazaq Times”