فوتو: نوۆوستي كرىما

تۇركيا ءوز اۋماعىنا قىرىم كەمەلەرىن كىرگىزبەي قويدى – دەپ جازدى ءوزىنىڭ Facebook پاراقشاسىنا ۋكراينا باس پروكۋراتۋراسىنىڭ ءباسپاسوز حاتشىسى لاريسا سارگان.

ونىڭ سوزىنشە، قازان ايىنىڭ 6-سى كۇنى تۇركيا بيلىگى ءوزىنىڭ تەڭىز پورتتارىنا قىرىم كەمەلەرىن ەل اۋماعىنا كىرگىزۋگە شەكتەۋ قويۋ كەرەكتىگى جايىندا حاتتار جىبەرگەن. وسىدان باستاپ تۇركيا پورتتارى ايماققا كەلگەن كەز كەلگەن كەمەدەن قاي جەردەن كەلە جاتقاندىعى جايىندا قۇجاتتار سۇرايتىن بولعان. قۇجاتتارىنا قىرىم ءمورى باسىلعان كەمەلەرگە پورت باسشىلىعىنىڭ قىزمەت كورسەتۋىنە تىيىم سالىنادى. بىراق ۋكراينا باس پروكۋراتۋراسىنىڭ وكىلى تاراتقان اقپاراتتى تۇركيا بيلىگى رەسمي راستاماعان.

ەستەرىڭىزگە سالايىق، بۇعان دەيىن تۇركيا پرەزيدەنتى رەجەپ تايىپ ەردوعان كيەۆكە رەسمي ءىس-ساپارمەن بارىپ، ۋكراينا باسشىسى پەتر پوروشەنكومەن كەزدەسكەن بولاتىن. كەزدەسۋ بارىسىندا ەردوعان: «ءبىز ۋكراينا تاۋەلسىزدىگى مەن تۇتاستىعىن قولدايمىز. الداعى ۋاقىتتا قانداس باۋىرلارىمىز قىرىم تاتارلارىنىڭ قۇقىقتارىن حالىقارالىق دەڭگەيدە قورعايتىن بولامىز» - دەپ مالىمدەگەن.

“The Qazaq Times”