حاليفا التايدىڭ 100 جىلدىعى كەڭ كولەمدە اتاپ وتىلەدى

مەرەيتوي كەزىندە «عىلىم ورداسىنىڭ» كىتاپحاناسى «قازاقستان عالىمدارىنىڭ بيبليوگرافياسى» سەرياسى بويىنشا «التاي حاليفا عاقىپۇلى» اتتى كىتاپ شىعارىلادى. بۇدان بولەك «حاليفا التاي جانە قايتا ورالعان تاريح» اتتى كونفەرەنتسيا جانە فوتوسۋرەت كورمەسى ۇيىمداستىرىلىپ، حاليفا التاي تۋرالى دەرەكتى فيلم تۇسىرىلەدى، دەپ جازادى ەگەمەن قازاقستانعا سىلتەمە جاساپ muftyat.kz.

1917 جىلى قىتاي حالىق رەسپۋبليكاسىندا ومىرگە كەلىپ، 2003 جىلى 15 تامىزدا قازاقستاندا قايتىس بولعان حاليفا التايدى بۇگىندە جۇرتشىلىق سان قىرلى ونەر يەسى رەتىندە تانيدى. قازاق دياسپوراسىنىڭ كورنەكتى قايراتكەرى قاسيەتتى «قۇران كارىم» كىتابىنىڭ قازاق تىلىندەگى تۇڭعىش اۋدارماشىسى عانا ەمەس، 1989-1990 جىلدارداعى باسپاگەرى، ءدىنتانۋشى، يسلامتانۋشى، جازۋشى، اقىن، انتروپولوگ، تاريحشى، ەتنوگراف، اۋدارماشى، قوعام قايراتكەرى رەتىندە تاريحتا قالدى. «الاش» سىيلىعىنىڭ العاشقى لاۋرەاتى، قازاقستان جازۋشىلار وداعىنىڭ مۇشەسى.

ول اتاجۇرتقا ەلباسىنىڭ شاقىرۋىمەن تۇركيادان  ورالعان ەدى. «قۇران كارىم» كىتابىنىڭ قازاق تىلىندەگى تۇڭعىش اۋدارماشىسى تۋرالى كەزىندە  ۇعا قۇرىلتايشىلارىنىڭ ءبىرى ءال-ماشاني: «وسى اۋدارما مەن ونىڭ تۇسىنىكتەرىنەن باسقا ەش نارسە جازباعان كۇننىڭ وزىندە،  حاليفا التاي قاجىنى ءىرى عۇلاما-عالىم قاتارىندا تانۋعا بولار ەدى»، دەپ باعالاعان بولاتىن.

«The Qazaq Times»