رەسەيدىڭ قورعانىس مينيسترلىگى اقش اۋە كۇشتەرىنىڭ "يسلام مەملەكەتى" لاڭكەستىك ۇيىمىنا قارسى كۇرەس جۇرگىزىپ وتىرعان كەيىپ تانىتقانىمەن، شىن مانىندە ولاردىڭ يراكتان سۇرياعا ەركىن وتۋىنە جاعداي جاساپ وتىر دەپ ايىپتادى. بۇل تۋرالى ۆۆس اقپاراتتىق اگەنتتىگى جازدى. 

قوس ەل اراسىنداعى جاعداي شيەلەنىسىپ تۇرعان ساتتە، رەسەيدىڭ قورعانىس مينيسترلىگى: "اقش-تىڭ اۋە كۇشتەرى قىركۇيەك ايىندا لاڭكەستەرگە قارسى اۋەدەن شابۋىل جاساپ وتىرعان اسكەري كۇشتەرىنىڭ سانىن قىسقارتتى. ءدال وسى ۋاقىتتا رەسەي قولداۋ كورسەتىپ وتىرعان ءسۇريا اسكەرى داير-ءاز-زاۋر قالاسىن قايتارۋ وپەراتسياسىن باستاعان ەدى", - دەپ مالىمدەدى.

رەسمي ورگاننىڭ حابارلاۋىنشا، ءسۇريا اسكەرى ءۇشىن ەڭ شەشۋشى ساتتەردىڭ بىرىندە اقش يراكتاعى "يسلام مەملەكەتى" ۇيىمىنا قارسى كۇرەسىندە وسالدىق تانىتىپ، سودىرلاردىڭ سۇرياداعى سوعىسقا قوسىلۋىنا مۇمكىندىك تۋدىردى. شەكارا اسىپ جەتكەن جاڭا كۇش ءسۇريا اسكەرىنىڭ جاعدايىن ءبىرشاما قيىنداتتى. رەسەي تاراپى بولعان جايتتى اقش-تىڭ قاساقانا جاساعان ارەكەتى دەپ باعالاپ وتىر.

“The Qazaq Times”