سولتۇستىك كورەيانىڭ ەڭ جوعارعى باسشىسى كيم جوڭ ۋن. فوتو: APF

سولتۇستىك كورەيا حاكەرلەرى وڭتۇستىك كورەيانىڭ قۇپيا اسكەري قۇجاتتارىنا قول جەتكىزگەنى تۋرالى حابارلادى. كورشى مەملەكەتتىڭ قورعانىس سالاسىنداعى جوسپارى قامتىلعان قۇجاتتاردا سولتۇستىك كورەيانىڭ پرەزيدەنتى كيم جوڭ ۋندى (Kim Jong Un) ءولتىرۋ تۋرالى ءبولىم بار بولىپ شىقتى. بۇل تۋرالى ۆۆس اقپاراتتىق اگەنتتىگى جازدى. 

وڭتۇستىك كورەيانىڭ زاڭ قىزمەتكەرى Rhee Cheol-hee ۆۆس-گە بەرگەن كوممەنتاريىندە جوعارىدا اتالعان اقپاراتتى ەلدىڭ قورعانىس مينيسترلىگى راستاعانىن ايتقان. دەگەنمەن اقپاراتتىق اگەنتتىكتەردىڭ سۇرانىسىن جاۋاپسىز قالدىرعان وڭتۇستىك كورەيانىڭ قورعانىس مينيسترلىگى قازىرشە ءۇنسىز قالۋدى ءجون كورىپ وتىر.

قولعا تۇسكەن قۇجاتتار قاتارىندا اقش پەن وڭتۇستىك كورەيا بىرلەسىپ جاساعان توتەنشە جاعدايعا ارنالعان اسكەري قيمىلدار جوسپارى دا بار. 235 گيگابايت كولەمدەگى ماڭىزدى اقپاراتتار وڭتۇستىك كورەيانىڭ اسكەري نىساندارى، ارنايى كۇشتەرى جونىندەگى دەرەكتەردى، گەنەرالداردىڭ ەسەپتەرىن قامتيدى. "كحدر حاكەرلەرىنىڭ قۇرىعىنا ىلىككەن دەرەكتەردىڭ 80 پايىزى ءالى انىقتالمادى", - دەپ جازادى ۆۆس اقپاراتتىق قىزمەتى.

بەرىلگەن مالىمەتتەرگە سايكەس، اسكەري قۇجاتتار وتكەن جىلدىڭ قىركۇيەك ايىندا قولدى بولعان. مامىر ايىندا وڭتۇستىك كورەيا ءوزىنىڭ دەرەكتەر بازاسىنان بىرقاتار مالىمەتتەر جوعالعانىن، بۇل سولتۇستىك كورەيانىڭ كيبەرشابۋىلى بولۋى مۇمكىن ەكەندىگىن ايتقان بولاتىن.

وڭتۇستىك كورەيانىڭ Yonhap مەملەكەتتىك اقپارات قىزمەتى سوڭعى جىلدارى كوممۋنيستىك جۇيەنى ۇستاناتىن كورشىلەرى تاراپىنان جاسالعان كيبەرشابۋىلدار جيىلەگەنىن جازادى. باسىلىمنىڭ مالىمدەۋىنشە، سولتۇستىك كورەيانىڭ حاكەرلەرى شەتەلدە، اسىرەسە، قىتايدا ارنايى وقىتۋ دايىندىعىنان وتكىزىلگەن.

“The Qazaq Times”