سولتۇستىك كورەياعا سالىنعان سانكتسيانى بۇزعان ءتورت جۇك كەمەسى قولعا ءتۇستى

بۇۇ-نىڭ سولتۇستىك كورەياعا قارسى سالعان سانكتسياسىن بۇزعانى ءۇشىن ءتورت جۇك كەمەسىنە الەمنىڭ كەز كەلگەن تەڭىز پورتىنا تاۋار جەتكىزۋگە تىيىم سالىندى. رەسمي وكىلدەردىڭ مالىمدەۋىنشە، جۇك كەمەلەرىنەن كحدر قارسى قولدانىسقا ەنگىزىلگەن سانكتسيا تىزىمىنە كىرەتىن تاۋارلار بولعان. بۇۇ-نىڭ قىرىنا ىلىككەن كەمەلەر:  Petrel 8, Hao Fan 6, Tong San 2 جانە Jie Shun. بۇل تۋرالى ۆۆس اقپاراتتىق اگەنتتىگى جازدى.

اشىق تەڭىزدەگى كەمە قوزعالىستارىن باقىلايتىن MarineTraffic ۆەب-سايتىندا  Petrel 8 كەمەسى كومور ارالدارىندا تىركەلىپ، Tong San 2 سولتۇستىك كورەيادا بايقالعان. بۇۇ-نىڭ سولتۇستىك كورەيا سانكتسيالارى بويىنشا كوورديناتورى Hugh Griffiths بۇل جاعدايدى "كۇتپەگەن وقيعاعا" بالادى.

ەستەرىڭىزگە سالا كەتەيىك، وتكەن ايدا بۇۇ سولتۇستىك كورەيانىڭ سوڭعى وتكىزگەن يادرولىق قارۋ سىناعىنا بايلانىستى بىرقاتار سانكتسيا قابىلداعان بولاتىن. جاڭا ەكونوميكالىق شەكتەۋ شارالارىنا سولتۇستىك كورەيا ەكسپورتىنىڭ نەگىزگى تاۋارلارى كومىر، جەڭىل ونەركاسىپ ونىمدەرىن ساتىپ الۋعا سالىنعان تىيىم، كحدر كاسىپكەرلەرىنە ينۆەستيتسياعا سالۋدى توقتاتۋ جانە اتالعان ەل ازاماتتارىن شەتەلدە جۇمىسقا قابىلداۋعا رۇقسات بەرمەۋ كىردى. بۇل باستاماعا  العاشقىدا ۆەتو قويىپ كەلگەن رەسەي مەن قىتاي دا قوسىلدى. قىتاي سولتۇستىك كورەيانىڭ ەڭ ۇلكەن ساۋدا ارىپتەسى ەسەبىندە جىل سايىن ونىڭ ەكونوميكاسىنا 3 ملرد دوللارعا جۋىق پايدا اكەلەتىن.

اقش-تىڭ بۇۇ-داعى ەلشىسى نيككي حەيلي سولتۇستىك كورەيا وسىعان دەيىن سالىنىپ كەلگەن سانكتسيالاردى اينالىپ ءوتۋدىڭ جولدارىن تاۋىپ، ونى استىرتىن قولدايتىن مەملەكەتتەر ءاردايىم تابىلاتىنىن ايتىپ، الاڭداۋشىلىق بىلدىرگەن ەدى. امەريكانىڭ بۇۇ-داعى وكىلىنىڭ ايتقانى تۋرا كەلىپ، سولتۇستىك كورەياعا قارسى سالىنعان سانكتسيالاردى بۇزعان كەمەلەر قولعا ءتۇسىپ وتىر.

“The Qazaq Times”