مەملەكەتتىك قۋىرشاق تەاترىنىڭ 80-ءشى ماۋسىمىنىڭ اشىلۋى. فوتو: QT

2017 جىلدىڭ 5 قازانىندا الماتى مەملەكەتتىك قۋىرشاق تەاترىنىڭ  كەزەكتى 83-ءشى ماۋسىمى اشىلدى. بيىل تەاتردىڭ اشىلۋى جاڭا فورماتتا باستالدى. سەبەبى تەاتر ۇجىمى بۇل جولى تەك قۋىرشاقتاردى عانا سويلەتىپ قانا قويماي، قوعامداعى ازعىندىق پەن كورسەقىزارلىقتى ساحنالاپ، كورەرەرمەنگە  جاڭا وي سالۋدى كوزدەيدى. 

يران عايىپتىڭ "بوشكە" دراماسى نەگىزىندە ساحنالانعان كورىنىس. فوتو: QT

وسىنداي ماقساتپەن تەاتردىڭ اشىلۋ سالتاناتى يران-عايىپتىڭ «بوشكە» دراماسىنىڭ نەگىزىندە رەجيسسەر رۇستەم جانامانوۆ ساحنالاعان كورىنىسپەن باستالدى.

ساحنالانعان كورىنىستە جارتى الەمدى بيلەپ، وعان كوزى تويماعان، "مەن-مەنمىن" دەپ كەۋدەسىن سوققان ەسكەندىر زۇلقارنايىننىڭ قازىرگى بەينەسى بەينەلەنەدى. ءتورت دۇنيەسى تۇگەل بولعان زۇلقارنايىن بايلىققا ماساتتانىپ، جان-جاعىندا نە بولىپ جاتقانىن ۇمىتادى.

ادەبيەت، مادەنيەت، ونەردى باعالاۋدان قالعان ول تەك سيقىرلى تار بوشكەنىڭ ىشىنە ەنگەندە عانا ءوزىنىڭ وتكەنىن، ەسىنە الىپ، ءومىرىنىڭ قۇر ماقتانمەن وتكەنىن تۇسىنەدى. وسى كورىنىس ارقىلى رەجيسسەر قازىرگى قوعامداعى جاستاردىڭ ادەبيەت پەن مادەنيەتتەن الىستاپ بارا جاتقانىن كورسەتكىسى كەلگەندەي.

"انا جۇرەگى" سپەكتاكلى. فوتو: QT

تەاتر ماۋسىمىنىڭ اشىلۋىندا ساحنالانعان ەكىنشى كورىنىس "انا جۇرەگى" دەپ اتالادى. بۇل كورىنىستى ساحناعا دايىنداعان رەجيسسەر انتون زايتسەۆ. كورەرمەن نازارىنا ۇسىنىلعان بۇل سپەكتاكل تەاتر تاريحىنا قوسىلعان جاڭا تۋىندى.

ساحنالانعان پەسانىڭ مازمۇنى اۋىر، دەگەنمەن بەرەتىن تاربيەسى مول. سەبەبى سپەكتاكل كەز كەلگەن جاستاعى كورەرمەنگە وي سالىپ، جۇرەگىنە يمان ۇيالاتادى.

انادان تۋعان جالعىز ۇل جوقشىلىققا كونبەي، قوعامدا ازعان جاستاردىڭ ارباۋىمەن اناسىنا قارسى شىعادى. التىنعا، بايلىققا ەلىرگەن ۇل اناسىنىڭ جان دۇنيەسىن تۇسىنۋگە دە تىرىسپايدى. جالعىز ۇلدىڭ اداسقانى سونشالىق اناسىنىڭ تۋعان كۇنىندە ونى تاستاپ كەتەدى.

انا بولسا تاعدىر ايلاسىنا الدانعان بالانىڭ تۋعان كۇنىنە قولىنداعى جانىپ تۇرعان جالعىز بالاۋىز شىراقتى سىيعا تارتقىسى كەلەدى. الايدا جالعىزىنىڭ ازابىن كوتەرە الماعان انا جۇرەگى  سول شىراقپەن بىرگە سونەدى.

“The Qazaq Times”