شىعىس قازاقستاندا كۇن ەلەكترستانتسياسى سالىنادى

شىعىس قازاقستاندا كۇننەن ەنەرگيا الىنباق. ونىڭ قۇرىلىس بارىسىن وبلىس باسشىسى دانيال احمەتوۆ پەن يسپاندىق «ARESOL» كومپانياسىنىڭ باسقارۋ ديرەكتورى ديەگو لۋازەس تالقىلادى، دەپ حابارلايدى شقو اكىمدىگىنىڭ ءباسپاسوز قىزمەتى.

قۋات كوزى 30 مۆت قۇرايتىن كۇن ەلەكترستانتسياسىنىڭ قۇرىلىسىن كەلەر جىلى ناۋرىز ايىندا جاڭعىزتوبە كەنتىندە باستاۋ جوسپارلانىپ وتىر. ديەگو لۋازەستىڭ سوزىنشە، شىعىس قازاقستان كۇننەن جىلۋ الۋعا قولايلى ءوڭىر بولعاندىقتان تاڭدالعان، سونىمەن قاتار «شق اەك» جەلىلەرىنىڭ وتكىزۋ قابىلەتى دە ەسكەرىلگەن.

"جوبانىڭ قۇنى 43 ميلليون دوللار شاماسىندا. قازىرگى تاڭدا ينۆەستيتسيا قۇيۋ جاعىن قاراستىرىپ جاتىرمىز. بۇل رەتتە ىسكە ءبىرىنشى كەزەكتە «ARESOL» كومپانياسى كىرىسەدى", – دەدى كاسىپكەر.

اكىمدىكتىڭ مالىمەتىنشە، جوبا ەلەكتر كوزىن ءداستۇرلى تۇردە ەمەس، ونىڭ بالاما كوزىن قولدانۋ ارقىلى الۋعا مۇمكىندىك بەرەدى.

“The Qazaq Times”