فوتو: Reuters

اقش ۇكىمەتى كۋباداعى ديپلوماتتارىن "قۇپيا كەسەلگە" ۇشىراۋىنا بايلانىستى ەلگە قايتارىپ جاتىر. وتكەن جىلى امەريكا كونسۋلدىعىنىڭ 21 قىزمەتكەرىنەن جەڭىل مي جاراقاتى، باس اينالۋ، جۇرەگى اينۋ جانە ەستۋ قابىلەتىنەن ايىرىلۋ سياقتى بەلگىلەر بايقالعان. ءدال وسىنداي سىرقاتقا ەكى كانادالىق ديپلومات تا شالدىعىپ وتىر. بۇل تۋرالى ۆۆس اقپاراتتىق اگەنتتىگى جازدى. 

اقش-تىڭ مەملەكەتتىك حاتشىسى رەكس تيللەرسون ەكى ەل بەلگىسىز جاعدايدا پايدا بولعان سىرقاتتىڭ سىرىن انىقتاۋعا بىرلەسە كىرىسۋى كەرەك دەپ مالىمدەسە، كۋبا وزىنە قاتىستى ايتىلعان بارلىق كۇمانداردى جوققا شىعاردى. وسىدان بۇرىن دەرتتىڭ سەبەبى ديپلوماتتار قونىستانعان ۇيلەردىڭ سىرتىنا ورناتىلعان جاسىرىن دىبىس تولقىندارىنان بولۋى مۇمكىن دەگەن بولجام ايتىلعان ەدى. اقش ءوز كەزەگىندە امەريكالىقتارعا كۋباعا ساپار شەكپەۋگە كەڭەس بەردى.

كۋباداعى "قۇپيا كەسەل" حرونولوگياسى:

  • 2016  جىلدىڭ سوڭى: اقش ەلشىلىگىنىڭ قىزمەتكەرلەرى مەن ءبىر كانادالىق ديپلومات وزىنەن بەلگىسىز اۋرۋ بەلگىلەرىن بايقاعان;
  • مامىر: اقش كۋباداعى ءوز ازاماتتارىن قورعاۋدى قالت جىبەرگەنى ءۇشىن ەكى كۋبالىق ديپلوماتتى ەلدەن شىعارىپ جىبەردى;
  • تامىز: اقش 16 قىزمەتكەردىڭ اۋرۋدان ايىققانىن حابارلادى
  • قىركۇيەكتىڭ باسى: اقش قۇپيا كەسەلدىڭ جاڭا جاعدايلارى تاعى 19 ديپلوماتتا تىركەلگەنىن جاريالادى;
  • 29 قىركۇيەك: ۋاشينگتون ءوز ديپلوماتتارىن ەلگە قايتارىپ، امەريكالىق ازاماتتارعا كۋباعا ساياحاتتاماۋدى ەسكەرتتى.

كىم كىنالى؟

اقش بولعان جاعدايعا كۋبانى كىنالاپ وتىرعان جوق. دەگەنمەن ەكى ەل دە كىنالى تاراپتى تابا الماي وتىر. كۋبا پرەزيدەنتى راۋل كاسترو اقش ديپلوماتتارىنا قارسى جاسالعان قاستاندىققا ءوز مەملەكەتىنىڭ قاتىسى جوقتىعىن مالىمدەدى. ماسەلەنىڭ ءمان-جايىن انىقتاۋ بويىنشا جۇمىستار جالعاسىپ جاتىر جانە زەرتتەۋ نىسانىنا ءۇشىنشى ەلدەر دە ەنۋى مۇمكىن.

اقش-كۋبا قاتىناستارى قالاي بولىپ ەدى؟

اقش گاۆاناداعى ەلشىلىگىن اراعا جىلدار سالىپ 2015 جىلى قايتا اشتى. 2016 جىلى سول كەزدەگى اقش پرەزيدەنتى بارا وباما 1928 جىلى مەملەكەت باسشىسى بولعان كالۆين كۋليدجدىڭ ساپارىنان كەيىن اراعا 88 جىل سالىپ، كۋباعا تابانى تيگەن العاشقى امەريكالىق پرەزيدەنت بولدى. دونالد ترامپ باراك وبامانىڭ كۋباعا قاتىستى ساياساتىن تولىق قۇپتاماسا دا، گاۆاناداعى ەلشىلىكتى جاپپايتىنىن حابارلادى.

“The Qazaq Times”