قازاقستان استىق ەكسپورتىن ارتتىرادى

قازاقستان 2017-2018 جىلدارعا ارنالعان استىق ەكسپورتىنا قاتىستى بولجامىن 9 ملن تونناعا دەيىن كوتەردى. بۇل تۋرالى ۇكىمەت وتىرىسىنىڭ كۋلۋارىندا قر اۋىل شارۋاشىلىعى ۆيتسە-ءمينيسترى گۇلميرا يساەۆا مالىمدەدى.

ول بۇرىنعى بولجام بويىنشا 8 ملن توننا استىق ەكسپورتتالۋ كەرەك ەكەنىن اتاپ ءوتتى. ونىڭ سوزىنشە، قازاقستان استىعى يران، قىتاي، وڭتۇستىك-شىعىس ازيا ەلدەرىنە ەكسپورتتالۋى مۇمكىن. سونداي-اق،  ورتالىق ازيا مەن كاسپي ايماعى ەلدەرى يمپورتەر رەتىندە قالا بەرەدى.

"بيىلعى جىلدىڭ 25 قىركۇيەگىندەگى جاعداي بويىنشا قازاقستان 20,368 ملن توننا استىق جينادى. وتكەن جىلدىڭ سايكەس كەزەڭىندە كورسەتكىش 19,044 ملن توننا بولعان. ءبىز بۇدان بۇرىن جالپى جينالاتىن استىق كولەمى  تازارتىلماعان كۇننىڭ وزىندە 19,5 ملن توننا بولادى دەپ بولجاعانبىز. وتكەن جىلى 21,5 ملن توننا بولعان", - دەدى ۆيتسە-مينيستر.

بۇدان بولەك، يساەۆا اۋىل شارۋاشىلىعىندا عالىمدار ويلاپ تاپقان يننوۆاتسيالىق تەحنولوگيالاردى  ەنگىزۋ قاجەت ەكەنىن اتاپ ءوتتى. الايدا عىلىمي ينستيتۋتتاردىڭ قاجەتتى وندىرىستىك ينفراقۇرىلىمدارى بولماعاندىقتان، وعان بيزنەس تە قوسىلۋ كەرەك.

جالپى، 2018-2020 جىلدارى اگرارلىق عىلىمدى قارجىلاندىرۋعا رەسپۋبليكالىق بيۋدجەتتەن بولىنگەن قارجى 12,6 ملرد تەڭگەنى قۇرايدى. قارجىلاندىرۋ عىلىمدى دامىتۋدىڭ 21 باسىم باعىتى بويىنشا جۇزەگە اسىرىلادى.

ايتا كەتەيىك، بۇعان دەيىن 2017 جىلدىڭ قاڭتار-شىلدە ايىندا قازاقستاننان 353,2 ملن دوللارعا 2,2 ملن توننا بيداي ەكسپورتتالعانى  جانە بۇل كورسەتكىش 2016 جىلدىڭ سايكەس كەزەڭىمەن سالىستىرعاندا توننا بويىنشا 13,1%-عا، اقشالاي تۇردە 12,9%-عا تومەندەگەنى تۋرالى حابارلانعان.

“The Qazaq Times”