فوتو: news.tj

اقش سەناتى Google, Facebook جانە Twitter كومپانيالارىن رەسەي ۇكىمەتىنىڭ امەريكاداعى پرەزيدەنتتىك سايلاۋ قورىتىندىلارىنا اسەر ەتۋ وقيعاسىنا قاتىسى بار-جوعىن انىقتاۋعا ارنالعان اشىق تىڭدالىمعا شاقىردى. وسى جىلدىڭ 1 قاراشاسىندا وتەتىن جيىندا الپاۋىت تەحنولوگيالىق كومپانيالار وزدەرى جيناپ، زەرتتەۋ كوميسسياسىنا ۇسىنعان دەرەكتەردى تانىستىرىپ، رەسەيدىڭ دونالد ترامپتى جاسىرىن قولداعانى جونىندە پىكىر بىلدىرەدى. بۇل تۋرالى APF اقپاراتتىق اگەنتتىگى جازدى. 

اشىق تىڭدالىم رەسەي امەريكاداعى پرەزيدەنت سايلاۋىنا ارالاستى دەگەن كۇدىكتى راستايتىن جاڭا دەرەكتەردىڭ تابىلۋىنا بايلانىستى ۇيىمداستىرىلىپ وتىر. اتالعان ماسەلەنىڭ اق-قاراسىن اجىراتۋعا جاۋاپتىلار امەريكالىقتار بار شىندىقتى جوعارىدا اتالعان كومپانيالاردان ەستىگەنىن قالايتىندارىن جەتكىزدى.

جاقىندا Facebook كومپانياسى  وتكەن جىلى رەسەيمەن بايلانىسى بار دەپ تانىلعان ازاماتتار وزدەرىنىڭ الەۋمەتتىك جەلىدەگى پاراقشالارىندا پرەزيدەنتتىك سايلاۋدىڭ بارىسىنا ىقپال ەتەتىن 3 مىڭعا جۋىق جازبالار جاريالاپ، جارنامالىق كونتەنت ءۇشىن ولاردىڭ 100 مىڭ اقش دوللارى كولەمىندە قارجى تولەگەنىن انىقتادى.

كومپانيا وكىلدەرى اتالعان جازبالاردىڭ تىكەلەي ءبىر كانديداتتىڭ اتىن اتاپ، بەلگىلى ءبىر تۇلعانى قولداۋعا شاقىرماسا دا، امەريكالىق قوعامدا كوزقاراستار قايشىلىعىن تۋدىرىپ، داۋىس بەرۋشىلەردىڭ اراسىندا ەرەكشە قولداۋعا يە حيللاري كلينتوننىڭ بەدەلىن تومەندەتۋگە ارنالعان دەگەن وي ءبىلدىردى.

“The Qazaq Times”