ءۇندىستان ارمياسى پاكىستان شەكاراسىنا اسكەر اتتاندىردى

رەسەي جانە قىتاي اقپاراتتىق قۇرالدارى، پاكىستاننىڭ ارانداتۋ ارەكەتىنە قارسى، ءۇندىستان جاق اۋىر اسكەري قارۋ-جاراقتارىن ءۇندىستان مەن پاكىستاننىڭ شەكاراسىنا ورنالاستىرىپ جاتقانىن حابارلاعان. ءارى پاكىستان جاققا «تەررورلىق ارەكەتتەردى جۇزەگە اسىرۋ ءۇشىن شەكارانى كەسىپ وتپەۋ» تۋرالى قاتاڭ ەسكەرتۋ جاساعان. بۇل تۋرالى «شينلاڭ» اقپاراتتىق سايتى جازدى.

رەسەي مەن قىتايدىڭ «سپۋتنيك»، «شينحۋا» اگەنتتىكتەرىنىڭ حابارىنا قاراعاندا، سوڭعى كەزدەرى ءۇندىستان-پاكىستان شيەلەنىسى ءورشىپ كەلەدى. قاقتىعىس تۋىلۋى مۇمكىن كاشمير ايماعىندا ءۇندىستان ارمياسى ون جىلدىق تاجىريبەلەرىن قايتا ىسكە قوسىپ وتىر. ياعني، تانكتەر جانە بروندالعان جاۋىنگەرلىك كولىكتەرمەن جابدىقتالعان اسكەرلەردى اتالعان ايماققا جەتكىزىپ، پاكىستان جاقتىڭ بارلىق اسكەري قيمىلىنا جاۋاپ بەرۋگە ازىرلەگەن.

مالىمەتتەرگە سۇيەنسەك، ەكى ەل شەكاراسىنا ءۇندىستان ارمياسىنىڭ 10-شى اتقىشتار ديۆيزياسى جەتكىزىلگەن. بۇل ديۆيزيا ءۇندىستان-پاكىستان اراسىنداعى قاقتىعىستاردا سىننان وتكەن، سوعىس تاجىريبەسىنە يە قوسىن سانالادى. ونىڭ بۇرىنعى جاياۋ اسكەرلەر قاتارى تولىقتىرىلعان. بۇلار كۇشتى جاۋىنگەرلىك قابىلەتكە يە، ءارى يادرولىق، حيميالىق شابۋىلدارعا دا تەز بەيىمدەلە الاتىن قوسىن دەپ اتالعان. بۇلارعا قوسا ءۇندى-پاكىستان شەكاراسىنا 100 دانا ت-72 تانكى جانە 100 رەسەيلىك مەحانيكالاندىرىلعان برونە-تەحنيكاسىن ورنالاستىرعان.

ءۇندىستان ارمياسىنىڭ بۇل قادامى سوعىسقا بۇتىندەي ازىرلىگىن تانىتىپ وتىر. ءارى پاكىستان جاققا ەسكەرتۋ جاساپ، ارانداتۋ جانە تەررورلىق ماقساتتاردى جۇزەگە اسىرۋ ءۇشىن ەكى ەل شەكاراسىنان كەسىپ وتپەۋىن ايتتى. الايدا، پاكىستاننىڭ بۇۇ-داعى وكىلى مالىمدەمە جاساپ، «ءۇندىستاننىڭ قازىرگى باسشىسى نارەندرا مودي ۇكىمەتىنىڭ ناسىلشىلدىك پەن فاشيزم يدەولوگياسى قالىپتاستىردى» دەپ ايىپتادى. ول جانە ءۇندىستاننىڭ بارلىق كورشىلەرىنە باعىتتالعان تەرروريزمدى قارجىلاندىرىپ وتىر دەپ جازعىردى. پاكىستان جاق حالىقارالىق قاۋىمداستىقتى كاشمير جاعدايىن وڭدى شەشۋگە شاقىردى. ءارى ءۇندىستاننىڭ ەكى ەل اراسىندا قول قويعان اتىستى توقتاتۋ كەلىسىمىن بۇزۋىنا جول بەرمەۋىن سۇرادى.

“The Qazaq Times”