كاشميردەگى ءۇندىستان قارۋلى كۇشتەرى. فوتو: VOA.

كەشە، 7 ءساۋىر كۇنى پاكىستان قورعانىس كۇشتەرى مالىمدەمە جاساپ، ءۇندىستان پاكىستانعا قارسى اسكەري ەرەۋىل ارەكەتتەرىنە دايىندالىپ جاتقانىن حابارلادى. پاكىستان تارابى حالىقارالىق قاۋىمداستىقتى شۇعىل تۇردە ءۇندىستاننىڭ وڭىردەگى قاۋىپسىزدىك پەن تۇراقتىلىققا قاتەر ءتوندىرۋ ارەكەتىن جويۋعا، ديپلوماتيالىق جولدارمەن ارالاسۋعا شاقىردى.

پاكىستاننىڭ ءسىم باسشىسى كۋرەشي مالىمدەمەسىندە: «بىزگە جەتكەن مالىمەتتەر بويىنشا ءۇندىستان پاكىستانعا قارسى اسكەري اگرەسسياعا دايىندالۋ ۇستىندە. ولار بۇل ارەكەتتى 16-20 ءساۋىر ارالىعىنا جوسپارلاپ وتىر»، – دەگەن. ونىڭ ايتۋىنشا، پاكىستان ۇكىمەتى بۇل ىسكە الاڭداۋشىلىق بىلدىرەدى جانە بارلىق مالىمەتتى بۇۇ-نىڭ يسلامابادتاعى وكىلدەرىمەن بولىسكەن.

«ءبىز حالىقارالىق قاۋىمداستىقتى بۇل ىسكە نازار اۋدارادى، ءۇندىستاننىڭ قاۋىپتى ارەكەتىنە جول بەرمەيدى دەپ ۇمىتتەنەمىز»، – دەدى پاكىستان سىرتقى ىستەر ءمينيسترى.

ال، ءۇندىستان سىرتقى ىستەر مينيسترلىگى تارابىنان جاسالعان مالىمدەمەدە: «بۇل اشىقتان اشىق ارانداتۋشىلىق پاكىستانداعى تەررورلىق توپتاردى ۇندىستانعا قارۋلى شابۋىل جاساۋعا شاقىرۋ»، – دەپ ايىپتاعان. سونداي-اق، جاڭا دەلي پاكىستاندى ءوز تەرريتورياسىنداعى تەررورلىق توپتارمەن كۇرەسۋدىڭ پراكتيكالىق قادامدارىنا شاقىردى. ءۇندىستان تارابى ەسكەرتۋ مالىمدەمەسىندە: «وڭىردەگى ترانسشەكارالىق تەرروريزممەن كۇرەسۋدە بۇنداي ارانداتۋ سيپاتىنداعى مالىمدەمەلەردى جىبەرمەيىك»، – دەلىنگەن.

ەستەرىڭىزدە بولسا، 26 اقپان كۇنى ۇندىستاندىق اۋە كۇشتەرى پاكىستان شەكاراسىنا ەنىپ، جاڭا دەلي تارابىنان لاڭكەستىك ۇيىمداردىڭ تۇراعى سانالعان نىساندارعا شابۋىل جاساعان. ءارى، پاكىستاندى تەررورلىق توپتاردى ۇندىستانعا قارسى ايداپ سالدى دەپ ايىپتاعان. تاراپتار ءبىر-بىرىنە قارسى بىرنەشە مارتە قارۋلى وپەراتسيالارعا دەيىن باردى. سودان بەرى ءۇندىستان مەن پاكىستان اراسىنداعى تاريحي قايشىلىق قايتادان ءورشىپ كەتكەن ەدى.

 “The Qazaq Times”