رەسەي پرەزيدەنتى ۆلاديمير پۋتين انكاراعا رەسمي ءىس-ساپارمەن بارادى – دەپ حابارلايدى تاسس اقپارات اگەنتتىگى.

رف باسشىسىنىڭ ءباسپاسوز حاتشىسى دميتري پەسكوۆتىڭ سوزىنشە، ۆلاديمير ءپۋتيننىڭ انكاراعا جاساعالى وتىرعان بۇل جولعى ءىس-ساپارىنىڭ ەڭ باستى ماقساتى - ءسۇريا ماسەلەسى بويىنشا تۇركيا پرەزيدەنتى رەجەپ تايىپ ەردوعانمەن كەلىسسوز جۇرگىزۋ. بۇدان بولەك ەكى ەل باسشىلارى ساۋدا-ەكونوميكالىق، ينۆەستيتسيالىق جانە ايماق قاۋىپسىزدىگى ماسەلەلەرى بويىنشادا اڭگىمە قوزعايتىن بولادى.

بۇعان دەيىن ۆلاديمير پۋتينمەن كەزدەسۋ جايىندا رەجەپ تايىپ ەردوعاندا ايتقان. ول اقش-تا وتكەن بيزنەس-فورۋمدا سويلەگەن سوزىندە: «بەيسەنبى كۇنى ءبىز رەسەي پرەزيدەنتى ۆلاديمير پۋتينمەن ءسۇريانىڭ يدليب پروۆينتسياسىنداعى جاعدايلارعا بايلانىستى كەلىسسوزدەر وتكىزەتىن بولامىز» - دەپ مالىمدەگەن.

ەستەرىڭىزگە سالايىق، ءسۇريا مەن يراكتاعى جاعداي يراك كۇردىستانى تاۋەلسىزدىگىن جاريالاۋعا بايلانىستى رەفەرەندۋم وتكىزگەنەن كەيىن تىپتەن ۋشىققان بولاتىن. تۇركيا، يران، يراك جانە ءسۇريا ەلدەرىنىڭ سوزىنشە، كۇردىستاننىڭ تاۋەلسىزدىك الۋى ايماقتا "يسلام مەملەكەتى" سىندى تەررورلىق ۇيىمداردان كەيىنگى ەكىنشى ءبىر سوعىس ءورتىن  تۇتاندىرۋى مۇمكىن. يراك كۇردىستانىنىڭ تاۋەلسىزدىگىنە بايلانىستى رەجەپ تايىپ ەردوعان: "ەگەر يراك كۇردىستانى تاۋەلسىزدىگىن جاريالايتىن بولسا، وندا كۇرد حالقى اش قالاتىن بولادى. ءبىز كۇردىستانعا ەكونوميكالىق تا، اسكەري دە قىسىم جاسايتىن بولامىز" - دەگەن بولاتىن.

“The Qazaq Times”