DEPO Evolution Park كەشەنى. فوتو: رۋستام ساعاديەۆ

وسى جىلدىڭ 15 قىركۇيەگىندە الماتىدا DEPO Evolution Park كەشەنى رەسمي تۇردە اشىلعان بولاتىن. ال بۇگىن قالا جاستارىنىڭ ءبىرازى باس قوسىپ، لوفت ورتالىقتىڭ قىزمەتىمەن تانىسىپ قايتتى.

اتالعان لوفت-ورتالىق "جاستار جىلى" اياسىندا الماتى جاستارى ءۇشىن  ارنايى اشىلدى دەۋگە بولادى. سەبەبى مۇندا الداعى ۋاقىتتان باستاپ مەگاپوليس جاستارىنا ارنالىپ ءتۇرلى ءىس-شارالار ۇيىمداستىرىلادى جانە قالا جاستارى باس قوساتىن ۇلكەن ورتالىققا اينالماق. باستىسى، ورتالىق قىزمەتى تەگىن.

DEPO Evolution Park جەتەكشىسى ەلنۇر بەيسەنباەۆتىڭ سوزىنشە، بۇل جەردى جاستار رەسمي تۇردە كەلەسى اپتادان باستاپ پايدالانا الادى.

DEPO Evolution Park جەتەكشىسى ەلنۇر بەيسەنباەۆ (وڭ جاقتا) جانە الماتى جاستارى

"بۇل ورتالىقتىڭ قۇرىلىمى ءالى دە وزگەرۋى مۇمكىن. مۇمكىن فورماتىن وزگەرتەتىن شىعارامىز. ءتۇرلى كلۋبتار اشىلادى. كەشەن جاستار ءۇشىن. بۇل جەردە تىكەلەي ينتەلەكتۋالدى جۇمىستار بولادى", - دەيدى ەلنۇر بەيسەنباي.

لوفت ورتالىق ازىرگە 5 قاباتتان تۇرادى. ءبىرىنشى، ەكىنشى قابات كوۆوركينگ ورتالىق بولادى. مۇندا ءاربىر ازامات كەلىپ، وزدەرىنىڭ ورتالىقتارىن قۇرىپ، وسى جەردە اشىلاتىن تەگىن اعىلشىن كۋرستارىنا قاتىسا الادى. ۇشىنشى قاباتتا جاس سۋرەتشىلەردىڭ كلۋبى بار. تورتىنشى قابارتتا بۇكىل قالا بويىنشا جاتاقحانالاردىڭ تالىمگەرلىكپەن اينالىساتىن ورنى، اۋىل جاستارىمەن جۇمىس ىستەۋ ورىندارى قۇرىلادى.

DEPO Evolution Park تانىستىرىلىمىنا جينالعان جاستار.

بۇل ورتالىقتىڭ عيماراتى بۇرىن سالىنعاندىقتان تەك جوندەۋ جۇمىستارى جۇرگىزىلگەن. وعان 60 ملن تەڭگەدەن اسا قاراجات جۇمسالعان.

سونداي-اق، ەلنۇر بەيسەنبايدىڭ سوزىنشە، الداعى ۋاقىتتا ورتالىق الاڭىنىڭ قالعان 2 گەكتارىنا بۇدان دا ۇلكەن لوفت-ورتالىق سالىنادى. ونى ىسكە قوسۋ ءۇشىن 2 ملرد تەڭگەدەن كوپ قاراجات جۇمسالۋى مۇمكىن. ونىڭ 1 ملرد تەڭگەسى مەملەكەت قاراجاتى بولسا، ال قالعانى دەمەۋشىلەر تاراپىنان بەرىلمەك.

ال ورتالىقتىڭ تانىستىرىلىمىنا قاتىسقان جۋرناليست رۋسلان جەلدىباي "ورتالىق جاستار اراسىندا  تانىمالدىققا يە بولۋ كەرەك" دەگەندى ايتادى.

جۋرناليست رۋسلان جەلدىباي مەن ساياساتتانۋشى ماقسات جاقاۋ،

"بۇل ورتالىق بىرىنشىدەن تەگىن، ەكىنشىدەن ينتەرنەت بار. مۇنى قولدانباۋدىڭ ءوزى سىن. بۇل ورتالىقتى مەنىڭشە، كوپ جاستار بىلمەيدى. سوندىقتان ونى جاقسىلاپ تانىستىرىپ، قىزمەتىن كورسەتۋ كەرەك. ارنايى روليكتەر دايىنداپ، مەترو ستانتسيالارىندا، ۋنيۆەرسيتەت تەلەارنالارىندا تانىستىرىپ، الەۋمەتتىك جەلىلەردەگى پاراقشالار ارقىلى جاستارمەن تىعىز بايلانىس ورناتۋ كەرەك. سونداي-اق، بۇعان جاقسى مەنەدجمەنت كەرەك. ءىرى-ءىرى شارالار ءوتۋ قاجەت. بۇل جەردە Share Knowledge دەگەن يدەيانى نەگە جاساماسقا؟! ءبىز ءوز بىلىمىمىزبەن ءبولىسۋىمىز كەرەك", - دەيدى ول.

ايتا كەتەيىك، DEPO Evolution Park الماتى قالاسى اكىمدىگىنىڭ قولداۋىمەن بۇرىنعى دەپو ترامۆاي پاركىنىڭ اۋماعىندا اشىلدى.

“The Qazaq Times”