تەرەزا مەي ەۋرووداقپەن ساۋدانى جالعاستىرۋدى ۇسىندى

ۇلىبريتانيانىڭ پرەمەر-ءمينيسترى تەرەزا مەي  "Brexit" جوباسى جۇزەگە اسقاننان كەيىن، ەكى جىل بويى ەۋرووداق پەن لوندون اراسىنداعى ساۋدا بايلانىستارى وداققا مۇشە كەزدەگى تالاپتار بويىنشا جۇرگىزىلگەنىن قالايدى. بۇل تۋرالى BBC اقپاراتتىق قىزمەتى جازدى. 

پرەمەر-ءمينيستردىڭ يتاليادا وتكەن جيىن بارىسىندا ايتقان ۇسىنىسى تىعىرىققا تىرەلگەن Brexit تالقىلاۋلارىنا جاڭا سەرپىن بەرەدى دەگەن ءۇمىت بار. تەرەزا مەي ەكى جىل ۋاقىت ارالىعىندا ۇلىبريتانيا ەۋرووداققا وداقتاس مەملەكەتتەرمەن قاتار جارنا تولەيتىنىن جانە وزگە ەۋروپا ەلدەرىنىڭ ميگرانتتارى ارنايى تىركەلۋ ارقىلى ۇلىبريتانياداعى ءومىرىن جالعاستىرا بەرەتىنىن حابارلادى.

ەۋرووداقتىڭ باستى كەلىسسوز جۇرگىزۋشى تۇلعاسى ميشەل بارنە تەرەزا مەيدىڭ ۇسىنىسىن "كونسترۋكتيۆتى، جيناقى وي" دەپ باعالاپ، ۇلىبريتانيا پرەمەرىنىڭ العا جىلجۋعا دەگەن قۇلشىنىسىن جىلى قابىلدادى.

تەرەزا مەي، سونداي-اق، ۇلىبريتانيا ەۋرووداقتان شىققاننان كەيىن دە تىعىز دوستىق بايلانىستار مەن ساۋدا ارىپتەستىگى جالعاسا بەرەتىنىنە سەنىم ءبىلدىرىپ، ول ءۇشىن جاڭا كەلىسىم دايىنداۋدى ۇسىندى. پرەمەر حانىم 2019 جىلدىڭ ناۋرىزىندا Brexit ءىس جۇزىندە ورىندالعاننان كەيىن، ۇلىبريتانيانىڭ ەكى جىل بويى تولەۋگە ءتيىستى قارجىسىن ناقتى اتاماعانىمەن، BBC لوندوننىڭ بەرەشەگىن 20 ملرد ەۋروعا باعالايدى.

تەرەزا مەي اتالعان ەكى جىل ىشىندە بارلىق ساۋدا اينالىمىنىڭ وسىعان دەيىنگى شارتتار نەگىزىندە قوسىمشا تاريفتەرسىز جۇرگەنىن قالايدى جانە كەدەن قاۋىپسىزدىگى سياقتى ماسەلەلەردە ۇلىبريتانيا شەشىم قابىلداۋ ىسىنە ارالاسۋىن جالعاستىرعانىن ورىندى كورەدى. "بىراق بۇل ۋاقىت ەكى جىلدان ارتىق ۇزارتىلماۋى كەرەك. ويتكەنى بريتاندىقتار دا، وزگە ەۋروپالىقتار دا ۇلىبريتانيانىڭ ەۋرووداقتا ونان ءارى قالعانىن قالامايدى",  - تەرەزا مەي.

“The Qazaq Times”