ەردوعان: الەم ءسۇريا حالقىن جالعىز قالدىرسا دا، ءبىز كومەگىمىزدى ايامايمىز

تۇرىك باسشىسى رەجەپ تايىپ ەردوعان يراكتاعى كۇرد اۆتونومياسىنىڭ تاۋەلسىزدىك الۋ رەفەرەندۋمىنا قارسىلىعىن بۇۇ باس اسسامبلەياسىنىڭ جينالىسىندا، الەم باسشىلارى اراسىندا دا ايتىپ ءوتتى. ول "بۇل قادام وڭىردەگى جاڭا قاقتىعىستاردىڭ بار ەكەنىن بىلدىرەدى" دەپ ەسكەرتتى. بۇل تۋرالى سول ەلدىڭ «تۇرىك تەلە-راديو» قىزمەتىنىڭ رەسمي سايتى جازدى.

تۇرىك باسشىسى بۇۇ-ءنىڭ كەزەكتى جينالىسىندا كۇرد جاساقتارىنان قۇرالعان PKK بولشەكتەۋشى تەررورلىق ۇيىمنىڭ ءسۇريا جەرىندە دە كۇش الىپ كەلە جاتقانىن، ونداعى حالىقتاردىڭ دەموگرافياسىنا جوسپارلى تۇردە وزگەرتۋلەر جاساپ جاتقانىن ايتىپ ءوتتى. ەردوعان سوزىندە: «ەگەر ءبىز دايش-كە قارسى كۇرەستى جۇيەلى تۇردە جۇرگىزبەسەك، وندا ەكىنشى ءبىر دايش پايدا بولادى»، - دەدى.

تۇركيا پرەزيدەنتى كورشىلەس ءسۇريا ەلىندەگى سوعىس جاعدايىن دا ءسوز ەتتى. «التى جىلدان بەرى سوعىس قاسىرەتىن كورگەن ءسۇريا حالقىن، بۇكىل الەم جالعىز قالدىرسا دا تۇركيا ءوزىنىڭ ساياسي جانە گۋمانيتارلىق كومەگىنەن باس تارتپايدى. قازىر تۇركيانى 3 ملن سۇريالىق جانە 200 مىڭ يراك ازاماتى پانالاپ وتىر. ولارعا 30 ملرد اقش دوللارى كولەمىندە كومەك كورسەتىلدى. الايدا، ەۋروپا وداعى ءوزىنىڭ ۋادە ەتكەن گۋمانيتارلىق كومەگىن ءالى دە جەتكىزىپ بەرمەدى»، – دەدى ول.

سونداي-اق، ەردوعان كاتار داعدارىسىنا ارا اعايىندىقتى جالعاستىراتىنىن اتاپ ءوتتى. جينالىستا ميانما مۇسىلماندارىنا جاسالعان قىرعىندى دا تىلگە تيەك ەتىپ، حالىقارالىق قاۋىمداستىقتىڭ بۇل ماسەلەدە جاۋاپكەرشىلىك تانىتپاي قالعانىن دا سىنعا الدى. ءسوزىنىڭ سوڭىندا ول ايماقتاردا بولىپ جاتقان قاقتىعىستارعا قاراتا: «كوزىمىزدىڭ رەڭى ءار ءتۇرلى بولعانىمەن، ودان اققان جاسىمىزدىڭ رەڭى بىردەي»، – دەدى.

“The Qazaq Times”