سوڭعى كۇندەرى جاسىرىن قوڭىراۋلار كۇللى رەسەيدى ۇرەيلەندىردى

سوڭعى كۇندەرى رەسەي ۇكىمەتىن اۋرە سارساڭعا سالعان «تەلەفون تەرروريزم» ىستەرى بولىپ وتىر. رەسەيدىڭ كوپتەگەن قالالارىندا جاسىرىن نومەرلەرمەن قوڭىراۋ شالىپ، الەۋمەتتىك ورىنداردىڭ بىرىندە جارىلعىش ورناتىلعان دەگەن مازمۇنداعى حابارلاما بەرىپ، ۇكىمەت ورىندارى مەن پوليتسيانى اۋرە سارساڭعا سالعان ارەكەتتەردىڭ كوبى دەرلىك جالعان بولىپ شىقتى. بۇل جاسىرىن قوڭىراۋلار ۇكىمەتتى ماقساتتى تۇردە ابىگەرگە سالۋ ارەكەتتەرى رەتىندە قارالىپ، كرەملدىڭ نازارىنا ءىلىندى. بۇل تۋرالى "شينلاڭ" اقپاراتتىق سايتى جازدى.

كرەملدىڭ مالىمدەمەشىسى دميتري پەسكوۆ 15 قىركۇيەك كۇنى تۇستەن بۇرىنعى جاساعان حابارلاماسىندا، رەسەي پرەزيدەنتى ۆلاديمير پۋتينگە «تەلەفون تەرروريزمى» تۋرالى مالىمدەمە بەرىلگەنىن ايتتى. ول ءبىر كۇن بۇرىنعى مالىمدەمەسىندە: «بۇل ناعىز «تەلەفون تەرروريزم» ارەكەتى. قوڭىراۋلار ارقىلى قوعام تىنىشتىعىن ءبۇلدىرۋ ءىسى بولىپ سانالادى. بۇدان ەل پرەزيدەنتى حابار تاپتى، ءارى ءىستى تەكسەرىپ انىقتاۋعا نۇسقاۋ بەردى. قازىر قاۋىپسىزدىك تاراۋلارى بۇل جاسىرىن قوڭىراۋلاردى انىقتاۋدىڭ بارلىق شارالارىن ىسكە قوستى. تەكسەرۋ ءىسىنىڭ جەمىستى بولۋىن كۇتىڭىزدەر»، – دەدى.

سوڭعى بەس كۇندە جاسىرىن قوڭىراۋلارى ارقىلى حابار بەرىپ، بەلگىلى ءبىر ساۋدا ورتالىعى نەمەسە ۆوكزالداردا جارىلعىش قويىلعان دەگەن حابارلامالار رەسەي قاۋىپسىزدىك قىزمەتكەرلەرىن اۋرەگە سالىپ كەلگەن. مۇنداي «تەلەفون تەرروريزم» ىستەرى ەلدىڭ ورتالىق قالاسىندا دا بولىپ، جالپى سانى 40 مىڭنان استام ادامدار ايتىلعان ورىنداردان ەۆاكۋاتسيالاندى. الايدا، بۇل حابارلامالاردىڭ ءبارى دە جالعان بولىپ شىقتى.

ال تۇتاس رەسەي اۋماعىندا ءانونيمدى تەلەفون قاتەرىنە بايلانىستى 12 قىركۇيەكتە 13 قىركۇيەككە دەيىن، ادامدار كوبىرەك جينالاتىن 402 ورىننان كەم دەگەندە 130 مىڭ ادام كوشىرىلدى.

رەسەيلىك قۇقىق قورعاۋ ورگاندارىنىڭ دەرەككوزدەرى حابارىندا، بۇل قوعام تىنىشتىعىن ءبۇلدىرۋ ارەكەتتەرى «يسلام مەملەكەتى» تەررورلىق ۇيىمىمەن بايلانىسى بار بولۋى مۇمكىن دەلىنگەن. ءارى قوڭىراۋلاردىڭ كوبى رەسەيدىڭ تەرريتورياسىنان تىس جەرلەردەن سوعىلعان بولۋى مۇمكىن دەگەن بولجام دا بار. قازىر قاۋىپسىزدىك جانە بارلاۋ ورگاندارى كۇدىكتىلەردى ىزدەستىرۋ ۇستىندە.

“The Qazaq Times”