فوتو: Evan Vucci/AP

دونالد ترامپ "كاتار داعدارىسى" ماسەلەسى بويىنشا مەدياتور قىزمەتىن اتقارىپ وتىرعان كۋۆەيتتىڭ ءامىرى ساباح ءال-احمەد ءال جابەر اس-ساباحپەن كەزدەسۋ بارىسىندا پارسى شىعاناعى ەلدەرىنىڭ ديپلوماتيالىق بايلانىستارىن قايتا قالپىنا كەلتىرۋگە ىقپال ەتۋ نيەتىن ءبىلدىردى. بۇل تۋرالى ء"ال-جازيرا" اقپاراتتىق اگەنتتىگى جازدى.

كۋۆەيت ءامىرى ءۇش ايدان استام ۋاقىتقا سوزىلعان كاتار مەن ساۋد ارابياسى، بىرىككەن اراب امىرلىكتەرى، ەگيپەت، باحرەين مەملەكەتتەرىنىڭ اراسىنداعى كەلىسپەۋشىلىك كەزىندە اسكەري ينتەرۆەنتسيا جاسالۋ مۇمكىندىگىنە توسقاۋىل قويعانىن حابارلادى. ءوز كەزەگىندە اراب ەلدەرىنىڭ "تورتتىگى": "اسكەري قاقتىعىستار بولۋى مۇمكىن ەكەنى تۋرالى ءسوز ەشقاشان قوزعالماعان جانە بولاشاقتا دا بۇل تاقىرىپ كوتەرىلمەيدى", -دەپ، كۋۆەيت ءامىرىنىڭ مالىمدەمەسىنە نارازىلىق ءبىلدىردى.

كۋۆەيت ءامىرى سونداي-اق كاتاردىڭ اراب ەلدەرى ۇسىنعان 13 بولىمنەن تۇراتىن تالاپتارىنىڭ ءوز تاۋەلسىزدىگىنە نۇقسان كەلتىرمەيتىن تۇستارىن قايتا قاراستىرىپ كورۋگە ىنتالى بولىپ وتىرعانىن حابارلادى. وسى جىلدىڭ 5 ماۋسىمىندا اراب ەلدەرىنىڭ "تورتتىگى" كاتاردى "تەرروريزمدى قارجىلاندىرىپ وتىر" دەپ ايىپتاۋىنا بايلانىستى، تاراپتار اراسىنداعى ديپلوماتيالىق قارىم-قاتىناستار ۇزىلگەن بولاتىن.

ۋاشينگتوننان اقپارات تاراتقان ء"ال-جازيرانىڭ" ءتىلشىسى دونالد ترامپتىڭ بۇل ماسەلەگە قاتىستى وي ءبىلدىرۋ رەتى مەن ءسوز ەكپىنى وزگەرگەنىن ايتادى. وسىعان دەيىن كاتاردى جاقتاپ كەلگەن اقش پرەزيدەنتى، ەندى پارسى شىعاناعىنداعى بارلىق ەلدەردىڭ امەريكا ءۇشىن ماڭىزدى ەكەنىن اتاپ ءوتىپ، دوستىق بايلانىستار قايتا جاڭعىراتىنىنا ءۇمىت ارتىپ وتىر.

كاتاردىڭ سىرتقى ىستەر ءمينيسترى شەيح مۇحاممەد بين ابدۋلراحمان ءال تاني اراب ەلدەرىمەن كەلىسسوزدەر ۇستەلىنە وتىرۋ ءۇشىن قارسى تاراپتىڭ دوحانىڭ  بۇعاتتالعان كولىك جولدارىن قايتا اشۋدى سۇرايتىنىن جەتكىزدى. ال اراب ەلدەرى كاتاردىڭ الدىن-الا شارت قويۋىن ءجونسىز سانايدى.

دونالد ترامپ ءوز سوزىندە كۋۆەيت ءامىرىنىڭ مەدياتورلىق قىزمەتىن تولىق قولدايتىنىن جانە قوس تاراپتاردىڭ قارىم-قاتىناسى قالپىنا كەلمەسە، ديپلوماتيالىق داعدارىسقا قاتىسى بار بارلىق اراب مەملەكەتتەرىن ۋاشينگتون تورىنە ءوزى جيناپ، كەلىسسوزدەر الاڭىن قۇراتىنىن ايتتى.

“The Qazaq Times”