دەپۋتات تەڭگە كۋرسىن مانيپۋلياتسيالاعانداردى جازالاۋدى ۇسىندى

دەپۋتات، قازاقستان رەسپۋبليكاسى پارلامەنتى ءماجىلىسىنىڭ قارجى جانە بيۋدجەت كوميتەتىنىڭ مۇشەسى امانجان جامالوۆ تەڭگە كۋرسىن مانيپۋلياتسيالاپ وتىرعانداردى جازالاۋ كەرەگىن ايتتى.

ول ۆاليۋتا نارىعىنداعى جاعدايعا پىكىر بىلدىرە وتىرىپ، نارىقتا مانيپۋلياتسيا بولىپ وتىرعانىن العا تارتتى.

"ۇلتتىق بانكتىڭ، قارجى مينيسترلىگىنىڭ جانە ەكونوميكا مينيسترلىگىنىڭ دەرەكتەرى بويىنشا تەڭگەنىڭ ايىرباس باعامى مۇناي باعاسى، رەسەي ءرۋبلى، ەكونوميكانىڭ جاي-كۇيى سياقتى نەگىزگى فاكتورلار اسەرىنەن قالىپتاسادى. الايدا ءبىز ۆاليۋتا نارىعىنان باسقا جاعدايدى بايقاپ، قازىرگى كەزدە تەڭگەنىڭ السىرەۋىنە ەشبىر ماكروەكونوميكالىق جاعداي اسەر ەتپەگەنىن كورىپ وتىرمىز. كوپتەگەن قازاقستاندىقتاردىڭ كوكەيىندە "بۇل نە جاعداي؟" دەگەن سۇراق تۋىنداپ وتىر. سەبەبى مۇناي باعاسى نىعايىپ، رەسەي ءرۋبلى تۇراقتى جانە قازاقستاننىڭ ەكونوميكا كورسەتكىشى جاقسارعانىنا قاراماستان، تەڭگە قۇبىلىپ تۇر" - دەدى ول.

"مەنىڭشە، تەڭگە باعامى ۆاليۋتا نارىعىنداعى سۇرانىس پەن ۇسىنىسقا بايلانىستى بولعان كۇننىڭ وزىندە، ونىڭ قالىپتاسۋىنا ىشكى ۆاليۋتا نارىعىنداعى مولشەرىنىڭ  وتە از بولۋى ۇلكەن ءرول اتقارىپ وتىر. ماسەلەن، وسى جىلدىڭ ماۋسىم ايىندا ۇلتتىق بانككە تەڭگە باعامىن بەلگىلەۋ ءۇشىن 101 ميلليون دوللار جەتكىلىكتى بولدى، ال تامىزدا بۇل كورسەتكىشتى تەڭەستىرۋ ءۇشىن 70 ميلليون دوللار قاجەت بولدى. ياعني، كەيبىر ءىرى ويىنشىلاردىڭ نارىققا قاتىسۋى جانە ولاردىڭ كەلىسسوزدەرى تەڭگە باعامىنىڭ اۋىتقۋىنا اكەلۋى مۇمكىن جانە ايىرباس باعامىنىڭ ايىرماشىلىعىنا  بايلانىستى الىپساتارلىقتان ۇلكەن پايدا تابا الادى", - دەدى ماجىلىسمەن.

وسىلايشا ول ۇلتتىق بانكتەن مۇنداي مانيپۋلياتسيانىڭ ارتىندا كىم تۇرعانىن جانە مۇنىڭ كىمگە پايدا بولىپ وتىرعانىن ءتۇسىندىرۋدى سۇرادى. سونداي-اق، ول اكىمشىلىك قۇقىق بۇزۋشىلىق تۋرالى كودەكستە نارىق سۋبەكتىلەرىنىڭ باسەكەلەستىككە قارسى كەلىسىمدەرى مەن ينسايدەرلىك اقپاراتتى زاڭسىز پايدالانعاندار ءۇشىن جاۋاپكەرشىلىك قاراستىراتىنىن اتاپ ءوتتى.

"الايدا بۇل كودەكس ۆاليۋتا نارىعىندا مانيپۋلياتسيا جاساعانداردى جاۋاپقا تارتا المايدى. سوندىقتان ۇلتتىق بانك ۆاليۋتا نارىعىنداعى مانيپۋلياتسياعا قارسى ايىپپۇل تۇرىندەگى جاۋاپكەرشىلىك شارالارىن قاراستىرۋ كەرەك", - دەدى ول.

ايتا كەتەيىك، سوڭعى  ون كۇندە، ياعني 2017 جىلعى 21 تامىز بەن 6 قىركۇيەك ارالىعىندا  اقش دوللارىنا قاتىستى تەڭگە باعامى 2,6%-عا السىرەگەن. ۇلتتىق بانكتىڭ مالىمەتىنشە، بۇل بانكتەردىڭ، كومپانيالاردىڭ جانە حالىق تاراپىنان شەتەل ۆاليۋتاسىنا دەگەن سۇرانىستىڭ ارتىپ كەتۋىمەن بايلانىستى.

“The Qazaq Times”