گازا سەكتورىنداعى بالالاردىڭ جاعدايى اۋىر

حالىقارالىق "Save the Children" قايىرىمدىلىق قورى گازا سەكتورىنداعى 1 ميلليون بالا ءومىر سۇرۋگە قاجەتتى قاراپايىم مۇمكىندىكتەردەن تىس قالىپ وتىرعانىن جەتكىزدى. ۇيىمنىڭ وكىلدەرى: "گازا سەكتورىنداعى بالالار وتە اۋىر جاعدايدا ءومىر ءسۇرىپ جاتىر" دەپ مالىمدەدى. بۇل تۋرالى Al-Jazeera اقپاراتتىق اگەنتتىگى جازدى. 

قايىرىمدىلىق ۇيىمىنىڭ كەلتىرگەن دەرەكتەرىنە سايكەس، گازا سەكتورى ماڭىنداعى تەڭىز سۋىنىڭ 60 پايىزى قالدىق سۋلارمەن لاستانعان، سۋ رەسۋرستارىنىڭ 90 پايىزى ادام بالاسى ىشۋگە جارامسىز.

اعىمداعى جىلدىڭ ءساۋىر ايىنىڭ ورتاسىنان باستاپ، حاماس پەن پالەستينا پرەزيدەنتى ماحمۇد ابباستىڭ اراسىنداعى سالىققا بايلانىستى كەلىسپەۋشىلىكتەردەن كەيىن، وسى ءوڭىردى مەكەندەيتىن 2 ميللونعا جۋىق حالىق جارىقسىز قالىپ وتىر. كۇنىنە 3-4 ساعاتقا عانا بەرىلەتىن ەلەكتر ەنەرگياسى 740 مەكتەپتىڭ جۇمىسىن تەجەپ، قيىنداتقان.

بۇۇ گازا سەكتورىنداعى بلوكادا جۋىق ارادا شەشىلمەسە، 2020 جىلعا قاراي بۇل ايماق ادام مەكەندەۋگە جارامسىز ورىنعا اينالادى دەگەن مالىمدەمە جاساعان بولاتىن.

2007 جىلى حاماس توبى گازا سەكتورىن باسىپ العاننان بەرى، گۋمانيتارلىق داعدارىس جىل وتكەن سايىن ۋشىعىپ كەلەدى.

“The Qazaq Times”