مەكسيكا سىرتقى ىستەر ءمينيسترى مەن اقش مەملەكەتتىك حاتشىسى. فوتو: The Wall Street Journal.

مەكسيكانىڭ سىرتقى ىستەر ءمينيسترى Luis Videgaray سارسەنبى كۇنى حابارلاما جاريالاپ، «ەگەر اقش پرەزيدەنتى ترامپ سولتۇستىك امەريكانىڭ ەركىن ساۋدا تۋرالى كەلىسىمىندە (Nafta دەپ اتالاتىن) كەلىسسوزدەر بارىسىندا اقش-تى كەلىسىمنەن شىعاراتىن بولسا، مەكسيكا كەلىسسوزدەر ۇستەلىنەن شىعىپ كەتەدى» دەپ ەسكەرتكەن. بۇل تۋرالى اقش-تاعى «The Wall Street Journal» باسىلىمى حابارلادى.

ۋاشينگتوننىڭ شەنەۋنىكتەرىمەن بولعان كەلىسسوزدەن كەيىن، مەكسيكا ءسىم باسشىسى تىلشىلەردى قابىلداپ، مەكسيكانىڭ «Nafta» كەلىسىمىندە اقش جانە كانادامەن كەلىسىمدى قايتا قاراۋدى جالعاستىرىپ جاتقانىن ايتتى. جۋرناليستەردىڭ ءبىرى: «پرەزيدەنت ترامپتىڭ «Nafta» كەلىسىمىن توقتاتۋ مۇمكىندىگى بار ما؟ ەگەر مۇنداي جاعداي بولسا دا مەكسيكا كەلىسىمدى جالعاستىرا بەرە مە؟» دەگەن سۇراق قويدى. وعان Videgaray بىردەن كەسىپ ايتىپ: «جوق، ەگەر ترامپ اقش-تىڭ كەلىسىمنەن الىپ شىعاتىن بولسا، مەكسيكا دا كەلىسسوز ۇستەلىنەن شىعىپ كەتەدى»، – دەپ جاۋاپ بەردى. ءارى مەكسيكانىڭ اتالعان كەلىسىمدى توقتاتۋ اسا ءبىر ومىرشەڭ بولماعان شەشىم دەپ قارايتىنىن دا ايتىپ ءوتتى.

«Nafta» كەلىسسوزدەرىنىڭ ءبىرىنشى وتىرىسى وسى ايدىڭ باسىندا ۋاشينگتوندا بولىپ ءوتتى. ەكىنشىسى وتىرىسى بۇگىن مەكسيكانىڭ ورتالىق قالاسى مەكسيكادا باستالادى. سارسەنبى كۇنگى مالىمەتىندە ترامپ اتالعان كەلىسىمدى سىنعا الدى. الايدا كەلىسسوزدەر ءالى دە جالعاسىن تابۋدا. سولتۇستىك امەريكا ەركىن ساۋدا كەلىسىمى ترامپ العاش بيلىككە كەلگەن كەزدە كوبىرەك قولدايتىنىن ايتقان كەلىسىمدەردىڭ ءبىرى بولاتىن.

“The Qazaq Times”