ترامپ ميگرانتتاردى قولداۋ تۋرالى زاڭعا قول قويدى

اقش پرەزيدەنتى دونالد ترامپ مەكسيكا شەكاراسىنداعى ميگرانتتارعا قارجىلىق كومەك كورسەتۋ تۋرالى زاڭعا قول قويدى.

Livejournal.com سايتىنىڭ مالىمەتىنشە، جاڭا زاڭعا سايكەس مەكسيكامەن اراداعى شەكارادا ميگرانتتاردىڭ ماسەلەلەرىن شەشۋگە 4,6 ميلليارد دوللار بولىنەدى. تاياۋدا تەحاستاعى ميگرانتتاردى كۇتۋ ورتالىقتارىندا كەلەڭسىز جايتتار ورىن الىپ، جۇزدەگەن بالانىڭ بىرنەشە اپتا بويى اۋىز سۋسىز، تاماقسىز ءومىر ءسۇرىپ كەلگەنى انىقتالعان. وسىعان بايلانىستى اقش كەدەن قىزمەتىنىڭ باسشىسى دجون ساندەرس وتستاۆكاعا كەتكەن بولاتىن. ەندى بولىنگەن قارجىنىڭ 3 ميلليارد دوللارى ەل اۋماعىنا اتا-اناسىز كەلگەن بالالاردى كۇتۋگە جۇمسالادى. ال 1 جارىم ميللياردتان استام دوللار زاڭسىز ميگرانتتاردى ازىق-تۇلىك جانە باسپانامەن قامتاماسىز ەتۋگە ارنالادى. تومەنگى پالاتا ۇسىنعان جوسپاردى اق ءۇي باسشىسى ماقۇلداعاندىقتان بۇگىننەن باستاپ زاڭ رەسمي كۇشىنە ەنەدى.

امەريكا مەن مەكسيكا اراسىنداعى ميگراتسيالىق داۋ بىلتىردان بەرى جالعاسىپ كەلەدى. شەكارادا زاڭسىز بوسقىندار سانى ارتقاننان كەيىن اقش-تىڭ يمميگراتسيالىق جانە كەدەندىك باقىلاۋ قىزمەتىنىڭ باسشىسى كەۆين ماكەلينەن: «بوسقىنداردى ەلىنە قايتارامىز. امەريكا كوشباسشىسىنىڭ مالىمدەمەسىنە ساي، قۇقىق بۇزۋعا جانە زاڭسىز ارەكەتتەرگە جول بەرمەيمىز»، – دەگەن بولاتىن. زاڭسىز جولمەن شەكارا اسپاق بولعان بوسقىنداردى ەلىنە قايتارۋ ءۇشىن شەكاراعا قارۋلى اسكەريلەر ورنالاستىرىلعان.

"The Qazaq Times"