فوتو: نوۆوستي ۋزبەكيستانا

وزبەكستاندا يسلام كارىموۆكە ارنالعان تۇڭعىش ەسكەرتكىش ورناتىلدى - دەپ حابارلايدى جەرگىلىكتى باق وكىلدەرى.

بۇگىن تامىزدىڭ 31-ءى كۇنى وزبەكستاننىڭ قازىرگى پرەزيدەنتى شاۆكات ميرزيەەۆ پەن يسلام كارىموۆتىڭ ايەلى تاتيانا كارىموۆا تاشكەنت قالاسىندا ورنالاسقان پرەزيدەنت رەزيدەنتسياسى الدىندا يسلام كارىموۆكە ارنالعان ەسكەرتكىشتى اشقان. كارىموۆكە ارنالعان قولادان قۇيىلعان ەسكەرتكىشتىڭ اۆتورى وزبەكستاندىق ءمۇسىنشى يلحوم جابباروۆ. ول 2016 جىلى شاۆكات ميرزيەەۆ يسلام كارىموۆتىڭ ءمۇسىنىن جاساۋعا جاريالاعان حالىقارالىق كونكۋرستى جەڭىپ العان.

ەسكەرتكىشتىڭ اشىلۋ سالاتاناتىندا ءسوز سويلەگەن تاتيانا كارىموۆا: «مەن ەسكەرتكىش اۆتورىنا يسلام ابدۋعانيۇلى كارىموۆتىڭ بارلىق ادامي قاسيەتتەرىن ءبىر جەرگە توعىستىرا بىلگەنى ءۇشىن العىس ايتقىم كەلەدى» - دەگەن.

بۇدان بولەك تاتيانا كارىموۆا وزبەكستاننىڭ قازىرگى پرەزيدەنتى شاۆكات ميرزيەەۆقا يسلام كارىموۆتىڭ ساياساتىن جالعاسىتىرىپ جاتقاندىعىنا راحمەتىن ايتقان.

وزبەكستاندا يسلام كارىموۆتىڭ اتىنا ەسكەرتكىشتەن بولەك بۇقارا قالاسىندا كوشە، تاشكەنت قالاسىندا اۋەجاي بەرىلگەن. ال 2016 جىلدىڭ قاراشا ايىندا يسلام كارىموۆتىڭ ايەلى تاتيانا كارىموۆا مەن كىشى قىزى لولا كارىموۆا-تيللياەۆا يسلام كارىموۆ اتىنداعى قوعامدىق قايىرىمدىلىق قور قۇرعان بولاتىن.

ايتا كەتەتىن ءبىر جايىت يسلام كارىموۆ قايتىس بولعاننان كەيىن ونىڭ ۇلكەن قىزى گۇلنارا كارىموۆانىڭ ۇستىنەن جەمقورلىق، اقشا بوپسالاۋ، ۇيىمداسقان قىلمىستىق توپ قۇرۋ جانە ت.ب ايىپتار بويىنشا قىلمىستىق ءىس قوزعالعان. وزبەكستان باس پروكۋراتۋراسى تاراتقان مالىمەت بويىنشا، قازىرگى تاڭدا گۇلانارا كارىموۆانىڭ جەمقورلىقپەن تاپقان 2 ميلليارد دوللار قارجىسى الەمنىڭ 12 ەلىندە قۇندى قاعاز، بانك شوتتارى، جىلجىمايتىن مۇلىك تۇرىندە ساقتالعان.

“The Qazaq Times”