قازاقستان مەن بىرىككەن اراب امىرلىگى قازاقستاندىق ازاماتتار ءۇشىن امىرلىكتەرگە ۆيزاسىز كىرۋ ءتارتىبىن تالقىلادى. بۇل تۋرالى قر سىرتقى ىستەر مينيسترلىگىنىڭ ءباسپاسوز قىزمەتى حابارلادى. 

مينيسترلىكتىڭ مالىمەتىنشە، قازاقستاندىق تاراپ جالپىازاماتتىق پاسپورتتارىن يەلەنۋشى ەكى مەملەكەت ازاماتتارىنىڭ 30 كۇنگە دەيىن ۆيزادان بوساتىلۋىن كوزدەيتىن قۇجاتتىڭ كۇشىنە ەنۋى ءۇشىن مەملەكەتىشىلىك راسىمدەردى اياقتادى. بۇل جونىندە قازاقستاننىڭ بىرىككەن اراب امىرلىكتەرىندەگى ەلشىسى قايرات لاما شاريف ءباا ءسىم كونسۋلدىق قىزمەت دەپارتامەنتىنىڭ ديرەكتورى ياسەر اش-شيماليمەن بولعان كەزدەسۋدە مالىمدەدى.

ءوز كەزەگىندە ياسەر اش-شيمالي امىرلىكتەر تاراپى دا قازاقستان ازاماتتارىنىڭ ءباا-گە ۆيزاسىز بارۋىنا مۇمكىندىك بەرەتىن قول قويىلعان ەكى جاقتى حاتتامانىڭ كۇشىنە ەنۋى ءۇشىن مەملەكەتىشىلىك راسىمدەردى اياقتالۋعا جاقىن ەكەنىن حابارلادى.

2017 جىلعى قىركۇيەكتە ءباا ۇكىمەتىنىڭ قاۋلىسى بەكىتىلگەننەن كەيىن امىرلىكتەردىڭ بارلىق مەملەكەتتىك ورگاندارى، سونداي-اق ءابۋ-دابي، دۋباي جانە باسقا امىرلىكتەردىڭ حالىقارالىق اۋەجايلارى بۇل تۋرالى اقپارات الادى جانە وزدەرىنىڭ ىشكى ەرەجەلەرىنە تۇزەتۋلەر مەن وزگەرىستەر ەنگىزەدى.

ءباا ءسىم كقد ديرەكتورىنىڭ پىكىرىنشە، قازاقستان ازاماتتارى ءۇشىن امىرلىكتەرگە ۆيزاسىز كىرۋ ءتارتىبى شامامەن 2017 جىلعى قازان-قاراشادا كۇشىنە ەنەدى.

“The Qazaq Times”