فوتو: ريا نوۆوستي.

تامىزدىڭ 25-ءى كۇنى بريۋسسەل ورتالىعىندا پىشاقپەن قارۋلانعان بەلگىسىز ادام اسكەرلەرگە شابۋىل جاسادى، دەپ حابارلايدى جەرگىلىكتى RTBF تەلەارناسى.

Walla News جۋرنالىنىڭ مالىمەتىنشە، وقيعا جەرگىلىكتى ۋاقىت بويىنشا، ساعات 20:20 شاماسىندا بولعان. 30 جاستاعى سومالي ەلىنىڭ ازاماتى بريۋسسەل قالاسىنىڭ ورتالىعىن كۇزەتىپ جۇرگەن ەكى اسكەري قىزمەتكەرگە «اللاح اكبار» دەپ ايقايلاپ، پىشاق الا جۇگىرگەن. وسى كەزدە اسكەرلەر وعان قاراتا وق جاۋدىرعان. اۋىر جاراقات العان سومالي ەلىنىڭ ازاماتى كەيىننەن اۋرۋحانادا كوز جۇمعان. ال اسكەرلەر جەڭىل جاراقات العاندىقتان مەديتسينالىق كومەكتەن باس تارتقان.

وقيعادان كەيىن بەلگيا بيلىگى بريۋسسەل قالاسىن تولىق باقىلاۋدا ۇستاپ تۇرعاندارىن مالىمدەگەن.

ەستەرىڭىزگە سالايىق، 2016 جىلدىڭ ناۋرىز ايىندا بريۋسسەل قالاسىنا تەررورلىق شابۋىل جاسالىپ، سالدارىنان 32 ادام كوز جۇمعان بولاتىن. سودان بەرى ەل بيلىگى شاھار قاۋىپسىزدىگىن كۇشەيتكەن. وسى جىلدىڭ ماۋسىم ايىندا بەلگيا اسكەريلەرى بريۋسسەل ورتالىق تەمىر جول ۆوكزالىندا لاڭكەستىك شابۋىل جاساماقشى بولدى دەگەن كۇدىكپەن 36 جاستاعى ماروككا ەلىنىڭ ازاماتىن اتىپ ولتىرگەن بولاتىن.

“The Qazaq Times”