اقش-وڭتۇستىك كورەيا بىرلەسكەن وقۋ جاتتىعۋى. فوتو: We Are Change.

سولتۇستىك كورەيا قورعانىس كۇشتەرى 22 تامىز كۇنى مالىمدەمە جاساپ، اقش پەن وڭتۇستىك كورەيانىڭ بىرلەسكەن اسكەري جاتتىعۋى، كورەي تۇبەگىنىڭ شيەلەنىسىن كۇشەيتۋ ءۇشىن جاسالىپ وتىرعان ارانداتۋشىلىق ارەكەتى دەپ ايىپتادى. بۇل تۋرالى «شينحۋا» اگەنتتىگىنە سىلتەمە جاساي وتىرىپ قىتايلىق «شينلاڭ» اقپاراتتىق سايتى حابارلادى.

سولتۇستىك كورەيا مالىمدەمەسىندە "اسكەري جاتتىعۋدىڭ كەلتىرگەن زارداپتارىنا اقش قارۋلى كۇشتەرى تولىقتاي جاۋاپكەر بولۋى كەرەك" دەلىنگەن. كحدر حالىق ارمياسىنىڭ وكىلدەرى بەرگەن مالىمەتتەرگە قارعاندا، امەريكا قۇراما شتاتتارى مەن وڭتۇستىك كورەيانىڭ بىرلەسكەن اسكەري  جاتتىعۋلارىنا 17 مىڭ 500-دەن استام امەريكالىق، 50 مىڭنان استام كورەيالىق اسكەر قاتىسقان. وقۋ-جاتتىعۋعا اقش-تىڭ تىنىق مۇحيت اسكەري بازاسىنداعى قارۋ-جاراقتار تارتىلعان. سولتۇستىك كورەيانىڭ قورعانىس كۇشتەرىنىڭ مالىمەتىنە قاراعاندا، بۇل ارەكەتى كورەي تۇبەگىندە سوعىس اتموسفەراسىن قالىپتاستىرعانمەن بىردەي ەكەن.

كورەي تۇبەگىنىڭ قازىرگى جاعدايىندا اسكەري شيەلەنىستەر كۇرت ارتىپ كەتۋى بەك مۇمكىن. تۇبەكتەگى وسى ۇلكەن كۇشتەردىڭ ناقتى وپەراتسيالارعا بىردەن ءوتىپ كەتپەۋىنە ەشكىم دە كەپىلدىك بەرە المايدى. سولتۇستىك كورەيا مالىمدەمەشىسى سوزىندە: «ىرگەدەگى مۇنداي كۇشتى اسكەري قيمىلدى ەلەمەي قويۋ مۇمكىن ەمەس. قۇراما شتاتتار مەن وڭتۇستىك كورەيا اسكەري جاتتىعۋلارى جىل سايىن قورعانىستىق سيپاتتا ەكەنىن ايتادى. سونىمەن بىرگە «5015 جاۋىنگەرلىك جوسپارىنا» نەگىزدەلگەن، «شابۋىلدان قورعانۋ» جانە «جاسىرىن جاۋىنگەرلىك» جاتتىعۋلارعا نازار اۋدارۋ قاتارلىلارى بار. ەڭ باستىسى ولار سولتۇستىك كورەيانىڭ بالليستيكالىق زىمىراندارىنا قارسى قورعانۋ جاتتىعۋلارىمەن اينالىسۋدا. ال جاتتىعۋدان كەيىن، اقش سەناتىنىڭ توراعاسى، اقش-تىڭ تىنىق مۇحيتى كومانديرى جانە اقش-تىڭ باسقا اسكەري باسشىلارى كورەياعا بارادى. مىنە وسىلاردىڭ ءبارى كورەي تۇبەگى ماسەلەسىن اۋىرلاتا تۇسەدى»، – دەدى.

پيوڭياڭ (پحەنيان) جاقتىڭ ايتۋىنشا، سولتۇستىك كورەيا اسكەرلەرى اقش پەن وڭتۇستىك كورەيانىڭ ءار قادامىنا ەرەكشە نازار اۋدارادى. سەبەبى، بۇل كحدر-نىڭ قاۋىپسىزدىگىنە تىكەلەي قاتەرلى ارەكەتتەر. سولتۇستىك كورەيا "اسكەري ارەكەتكە شەشىم قابىلداماس ءۇشىن اقش كورەي تۇبەگىندەگى اسكەري بارلىق قادامدارىن توقتاتۋى كەرەك" دەپ قارايدى.

“The Qazaqq Times”