كيم جوڭ ۋن اسكەريلەر اراسىندا. فوتو: Daily Express.

سولتۇستىك كورەيا ەڭ جوعارى باسشىسى كيم جوڭ ۋن (كيم چەن ىن/Kim Jong Un) ەلدىڭ ورتالىق قالاسى پيوڭياڭدا (پحەنيان/Pyongyang) اسكەريلەرىمەن بولعان وتىرىستا، كەز-كەلگەن ۋاقىتتا زىمىران شابۋىلعا دايىن بولۋعا بۇيىردى. بۇل تۋرالى كحدر ورتالىق اقپارات اگەنتتىگىنە سىلتەمە جاساي وتىرىپ، «شينحۋا»-نىڭ رەسمي سايتى حابارلايدى.

كيم جوڭ ۋن سەيسەنبى كۇنى تاڭەرتەڭ گۋام ارالىنا زىمىران شابۋىلىن كۇشىنەن قالدىرعاننان كەيىن، اسكەريلەرمەن بولعان وتىرىسىندا: «اقش سولتۇستىك كورەيامەن سوعىسۋدىڭ الدىن الۋ كحدر-عا قاراتقان كوزقاراسى مەن ساياساتىن دۇرىس باعىتقا الىپ ءجۇرۋى كەرەك»،  – دەدى. سونىمەن بىرگە بارلىق بولىمدەگى اسكەري قولباسشىلاردىڭ كەز-كەلگەن ۋاقىتتا سوعىسقا دايىن بولۋىن ەسكەرتتى.

ەكى ەلدىڭ اراسىنداعى «اۋىزشا سوعىس» پەن يادرولىق، قالا بەردى زىمىران سوعىس قاتەرى 15 تامىزداعى سولتۇستىك كورەيا باسشىسىنىڭ مالىمدەمەسىنەن كەيىن ءبىرشاما سەيىلىپ قالدى. دەگەنمەن، كورەي تۇبەگى قايشىلىعى تولىقتاي جالعاسىن تاۋىپ وتىر. قازىر ءار قايسى تاراپ ءوز مۇددەسى مەن تۇبەك قايشىلىعى اراسىندا سىنالاپ جول تاۋىپ باعۋدا. الىپ دەرجاۆالار مۇددەسى تۇيىسكەن كورەي تۇبەگى قايشىلىعى جەر بەتىندە قىزىل بەلگىدەگى تۇيتكىلدى نۇكتەسىندە تۇر.

 “The Qazaq Times”