سولتۇستىك كورەيا گۋام ارالىنا شابۋىل جاسامايتىن بولدى

سولتۇستىك كورەيانىڭ رەسمي اقپارات قۇرالدارىنىڭ حابارىنا قاراعاندا، كحدر ەڭ جوعارى باسشىسى كيم جوڭ ۋن (كيم چەن ىن) شەشىم شىعارىپ،  گۋام ارالىنا زىمىران شابۋىلىنىڭ زاردابى بۇدان بۇرىنعى زىمىران سىناقتارىنان قاتەرلى دەپ قاراپ، شابۋىل جوباسىن قابىلداماعان. الايدا ول  ەگەر  اقش تاعى قاۋىپ تۋدىرسا نەمەسە ارتىق قادامدارعا بارسا شەشىمىن وزگەرتەتىنىن ايتىپ، ەسكەرتۋ جاساعان. بۇل تۋرالى «The Wall Street Journal» باسىلىمى حابارلايدى.

بۇگىن تاڭەرتەڭ جاريا ەتىلگەن بۇل حابارلاما كورەي تۇبەگى شيەلەنىسىن ءبىر ساتكە بولسا دا جەڭىلدەتتى دەۋگە بولادى. وتكەن اپتادا سولتۇستىك كورەيا مەن اقش پرەزيدەنتى دونالد ترامپ اراسىندا ءسوز سالىسۋلار، «اۋىزشا سوعىستار» شيەلەنىستى ءتىپتى  شىرماي تۇسكەن بولاتىن.

كيم جوڭ ۋن حابارلاما جاريالاپ، گۋام ارالىنا شابۋىل جوباسىنان باس تارتتى. وسى جاساعان «كىشىلىگى» ءۇشىن اقش-قا ەسكەرتۋ بەرىپ: «اقش-تىڭڭ كحدر-عا قاراتقان ارانداتۋشىلىق پەن سىڭارجاقتى ساياساتىن تىزگىندەۋ جاۋاپكەرشىلىگى بار. بۇدان كەيىن سولتۇستىك كورەيانىڭ اشۋ-ىزاسىن تۋدىرا بەرمەۋ كەرەك»، - دەدى. ول تاعى دا: «امەريكا قۇراما شتاتتارى كورەي تۇبەگى جانە ونىڭ ماڭىنداعى سۋ الاپتارىنا قاتەر ءتوندىرۋىن تىزگىندەۋى ءتيىس. سولتۇستىك كورەيانىڭ ءوزىن ءوزى قورعاۋىنا كەدەرگى جاساماۋى كەرەك»، – دەدى.

ول ءسوزىنىڭ سوڭىندا: «دەگەنمەن ءبىز گۋام ارالىنا شابۋىل جاساۋ دايىندىعىن توقتاتىپ تاستامادىق. اقش ءوزىنىڭ نيەتىنەن جازباسا ءبىز وسى ءبىر اسەرلى تاريحي ءسات ارقىلى اقش-قا اۋىر جۇدىرىق سىلتەپ، قۇراما شتاتتىڭ كەڭىردەگىنە پىشاق تىرەيتىن بولامىز»، - دەدى.

سونىمەن، سولتۇستىك كورەيا گۋام ارالىنا شابۋىل جاسامايتىن بولدى. بۇل شەشىمىنىڭ وتەۋىنە كيم جوڭ ۋن اقش-تىڭ اشۋىنا تيەتىن ءسوزدى اياپ قالعان جوق. كورەي تۇبەگى گەوساياسي شيەلەنىسى ۋاقىتشا بولسا قاتەردەن الىستادى. بىراق بۇل تۇماننىڭ ءبىر جولا سەيىلىپ كەتكەنى ەمەس. سولتۇستىك كورەيانىڭ بۇل قادامىنا اقش قانداي رەاكتسيا قايتاراتىنى ءالى بەيمالىم.

“The Qazaq Times”