وزبەكستاننىڭ «پاحتاكور» فك اۋە اپاتىنا ۇشىراۋىنا برەجنەۆتىڭ قاتىسى بار بولعان

كەشە تامىزدىڭ 11 كۇنى وزبەكستاننىڭ «پاحتاكور» فۋتبول كلۋبىنىڭ اۋە اپاتىنا ۇشاراعانىنا 38 جىل بولدى. 1979 جىلى تامىزدىڭ 11-ءى كۇنى «پاحتاكور» فك ويىنشىلارى مىنگەن تۋ-154 ۇشاعى ۋكراينانىڭ دنەپرودزەرجينسك قالاسىنىڭ ماڭىندا تاعى ءبىر تۋ-134 ۇشاعىمەن سوقتىعىسىپ اپاتقا ۇشىراعان بولاتىن. ءبىز بۇگىن سول اپاتتىڭ نە سەبەپتى ورىن العاندىعىنا قىسقاشا توقتالۋدى ءجون كوردىك.

1979 جىلى 11-ءشى تامىز كۇنى تاشكەنتتىڭ «پاحتاكور» فۋتبول كلۋبى مينسكىلىك (بەلورۋسسيا) «دينامو» فك قوناققا بارۋى ءتيىس بولعان. كەڭەستەر وداعىنىڭ «اەروفلوت» اۋە كومپانياسىنىڭ تۋ-154 ۇشاعى جەرگىلىكتى ۋاقىت بويىنشا ساعات 11:30-دا تاشكەنت اۋە جايىنان مينسك قالاسىنا اتتانادى. بۇدان 20 مينۋت بۇرىن چەليابينسكىدەن كيشينەۆقا تاعى ءبىر تۋ-134 ۇشاعى اۋەگە كوتەرىلەدى. ءدال وسى ۋاقىتتا حاركوۆسك اۋەجايىندا سەرگەي سەرگەەۆتىڭ باسقارۋىمەن ۆلاديمير سۋمسكوي مەن نيكولاي جۋكوۆسي ديسپەچەرلىك قىزمەتتەرىن قابىلداپ الادى. بىراق ءالى كۇنگە دەيىن نەگە سەرگەي سەرگەەۆتىڭ سول كۇنى باسقارۋدى سۋمسكويعا ەمەس، تاجىريبەسىز جۋكوۆسكيعا بەرگەندىگى بەلگىسىز بولىپ كەلەدى. ويتكەنى اپاتتى زەرتتەۋدىڭ رەسمي قورىتىندىسى بويىنشا، ءدال سول نيكولاي جۋكوۆسكيدىڭ سالعىرتتىعى سالدارىنان تۋ-154 پەن تۋ-134 ۇشاقتارى اپاتقا ۇشىراعان.

فوتو: wikipedia.org

تەكسەرۋ بارسىندا جۋكوۆسكي تۋ-154 پەن تۋ-134 ۇشاقتارى اۋەدە ءبىر نۇكتەنى 3 مينۋت ايىرماشىلىعىمەن ۇشىپ وتەدى دەپ ەسەپتەگەن. الايدا ولاردىڭ ەنشىسىندە تەك 60 سەكۋنت عانا ۋاقىت بولعان. سول ۋاقىتتا بۇل قاتەلىكتى بايقاعان سۋمسكوي ۇشاقتاردىڭ بىرىنە جوعارى ۇشۋىن سۇراپ حابارلاما جىبەرەدى. بىراق بۇل حابارلامانى تۋ-154 پەن تۋ-134 ۇشاقتارى ەمەس، مۇلدە باسقا باعىتتا ۇشىپ بارا جاتقان يل-62 ۇشاعى قابىلداعاندىعى انىقتالعان.

رەسمي تەكسەرۋلەردىڭ قورىتىندىسى بويىنشا، كەڭەستەر وداعىنىڭ سوتى اپاتقا حاركوۆسك اۋەجايىنىڭ ديسپەچەرلەرىنىڭ سالعىرتتىعى سەبەپشى بولدى دەگەن شەشىم شىعارىپ، سۋمسكوي مەن جۋكوۆسكيدى 15 جىلعا سوتتاعان. سەرگەي سەرگەەۆ بۇل ءىس بويىنشا مۇلدە قاراستىرىلماعان. سۋمسكوي 15 جىلدىڭ 6 جىلى وتكەندە جاقسى ءتارتىبى ءۇشىن بوستاندىققا شىققان. ال جۋكوۆسكي تۇرمەدە ءوز-وزىنە قول جۇمساپ، كوز جۇمعان.

فوتو: ريا نوۆوستي.

بىراق سول ۋاقىتتا اپاتتىڭ نە سەبەپتەن بولعاندىعىنا بايلانىستى رەسمي مالىمدەمەدەن بولەك، بەيرەسمي دە اقپاراتتار حالىق اراسىندا كەڭىنەن تارالىپ كەتكەن. سولاردىڭ ءبىرى تۋ-154 پەن تۋ-134 ۇشاقتارىنىڭ ءبىر ۋاقىتتا 8400 مەتر بيىكتىكتە ۇشۋىنىڭ باستى سەبەبى، لەونيد برەجنەۆتىڭ قىرىمعا بارۋى ءۇشىن 10 مىڭ مەتر بيىكتىكتە وزگە ۇشاقتارعا ۇشۋىنا تىيىم سالىنۋى. بىراق ول ۋاقىتتا كەڭەستەر وداعىن ءدۇر سىلكىندىرگەن اپاتقا برەجنەۆتىڭ قاتىسى بار دەپ ايتۋ ءوز-ءوزىڭدى ولىمگە قيۋمەن تەڭ بولعان.

“The Qazaq Times”