فوتو: express.co.uk

ۋاشينگتون مەن پيوڭياڭ (پحەنيان) بىرنەشە اي بويى «قۇپيا نيۋ-يورك» ديپلوماتيالىق كەلىسىمىن جۇرگىزۋدە - دەپ حابارلايدى نەمىس تولقىنى ار اقپارات اگەنتتىگىنە سىلتەمە جاساپ.

ار اگەنتتىگىنىڭ مالىمەتىنشە، اقش پرەزيدەنتى دونالد ترامپ اكىمشىلىگىنىڭ سولتۇستىك كورەيا بيلىگىمەن كەلىسسوز جۇرگىزەتىن قۇپيا ديپلوماتيالىق ارنالارى بار. بىرنەشە اي بويى اقش مەملەكەتتىك دەپارتامەنتىنىڭ كحدر بويىنشا ارنايى وكىلى دجوزەف يۋن مەن سولتۇستىك كورەيانىڭ بىرىككەن ۇلتتار ۇيىمىنداعى جوعارى لاۋازىمدى ساياساتكەرى پاك سون يل قۇپيا كەلىسسوز جۇرگىزىپ كەلگەن. ازىرگە اقش-تىڭ سولتۇستىك كورەيا بيلىگىنە شىعاتىن ءبىر عانا ادامى بار. ول دجوزەف يۋن.

بىراق ونىڭ جۇرگىزىپ جاتقان قۇپيا ديپلوماتيالىق كەلىسسوزدەرى ازىرگە ەكى ەل اراسىنداعى ۋشىعىپ تۇرعان ساياسي جاعدايدىڭ شەشىلۋىنە سەپتىگىن تيگىزە الماي وتىر.

بۇلاي دەيتىن سەبەبىمىز تامىز ايىنىڭ 8-ءى كۇنى دونالد ترامپ: «ەگەردە كحدر ءوزىنىڭ ارانداتۋىن توقتاتپاسا، وندا ول الەم تاريحىندا بولىپ كورمەگەن الىپ كۇشكە تاپ بولادى» - دەگەن بولاتىن. ترامپتىڭ وسى مالىمدەمەسىنەن كەيىن، بىرنەشە ساعاتتان سوڭ سولتۇستىك كورەيا اسكەريلەرى اقش اسكەري بازاسى ورنالاسقان گۋام ارالىن اتقىلايتىندىعى جايىندا اقپارات تاراتقان. ال 11-ءشى تامىز كۇنى دونالد ترامپ سولتۇستىك كورەيا ماسەلەسىن اسكەري كۇش قولدانۋ ارقىلى شەشەتىندىگىن ايتىپ، رەسمي پيوڭياڭعا (پحەنيان) تاعىدا سەس كورسەتكەن. بىراق كحدر اقش پرەزيدەنتىنىڭ بۇل مالىمدەمەسىنە ازىرگە ەشقانداي رەسمي جاۋاپ قاتقان جوق.

“The Qazaq Times”