تيللەرسون: امەريكا حالقى الاڭسىز ۇيىقتاۋى ءتيىس

اقش مەملەكەتتىك حاتشىسى رەكس تيللەرسون، اقش جەرگىلىكتى ۋاقىتىمەن 9 تامىز كۇنى سويلەگەن سوزىندە: «مەنىڭ پايىمداۋدا، سوڭعى 24 ساعات ىشىندە سولتۇستىك كورەيا ماسەلەسىندە ايتارلىقتاي وزگەرىستەر ورىن الا قويعان جوق. مەنشە قاۋىپتى جاعىداي تۋىلعالى تۇرعان جوق. سوندىقتان، امەريكا حالقى وتكەن بىرنەشە كۇنگى جاعدايلاردان الاڭداپ كەتپەي، قامسىز ۇيىقتاي بەرۋىنە بولادى»، – دەدى. بۇل تۋرالى قىتايدىڭ «شينلاڭ» اقپاراتتىق سايتى جازدى.

ول مالايزيادان گۋام ارالىنا ۇشاتىن ۇشاقتا جۋرناليستتەرگە ايتىپ بەردى. 8 تامىز اقش پرەزيدەنتى جۋرناليستەر سۇراعىنا جاۋاپ بەرگەن كەزدە، سولتۇستىك كورەيا اقش-قا تونەتىن ەڭ ۇلكەن قاۋىپ ەمەس دەپ ءتۇسىندىردى. ال، تيللەرسون بولسا پرەزيدەنتىنىڭ بۇل ءسوزىن كيم جوڭ ۋنعا قاتاڭ ەسكەرتۋ سيگنالى دەپ تۇسىنۋگە بولادى دەدى. ول تاعى: «مەنىڭشە كيم جوڭ ۋن ديپلوماتيالىق ءتىلدى تۇسىنە بەرمەيدى. پرەزيدەنت ترامپ سولتۇستىك كورەياعا تۇسىنىكتى ەتىپ ايتىپ ءوتتى – اقش ءوزىن جانە وداقتاستارىن قورعاۋعا تولىقتاي قابىلەتتى. اقش پرەزيدەنتى ولارعا قاتە شەشىم جاساماۋ ءۇشىن وسىلاي اشىق ءتۇسىندىرىپ وتىر»، – دەدى.

تيللەرسوننىڭ قاراۋىنشا، دونالد ترامپ اقش پرەزيدەنتى جانە اقش قورعانىس كۇشتەرىنىڭ ەڭ جوعارى قولباسشىسى رەتىندە سولتۇستىك كورەياعا بۇنداي قاتاڭ ەسكەرتۋ جاساۋى ورىندى. جۋرناليستەر اقش مەملەكەتتىك حاتشىسىنان «سوڭعى 24 ساعات ىشىندە اقش قورعانىس كۇشتەرىنە قارۋلارىن الىپ دايىندالاتىن قانداي دا ءبىر وقيعا تۋىلدى ما» دەپ سۇراعاندا، تيللەرسون: «مەنىڭ بىلگەندەرىم مەن كورگەندەرىمە قاراعاندا مۇنداي ءىس تۋىلمادى»، – دەپ جاۋاپ بەردى.

سولتۇستىك كورەيانىڭ گۋام ارالىنا شابۋىل جاسايمىز دەگەن مالىمدەمەسىنە قاراتا، ءبىر جۋرناليست: «گۋام ارالىنا باعىتتالعان مارشرۋت باعىتىڭىزدى  وزگەرتپەيسىز بە؟» دەگەن ساۋال قويدى. بۇعان تيللەرسوننىڭ قايتارعان جاۋابى بولسا: «سولتۇستىك كورەيانىڭ زىمىراندارى جەرگە باعىتتالۋى مۇمكىن. بىراق گۋام سوعىس وشاعى بولمايدى. مەن بۇعان بولا گۋام ساپارىمنان ۋاز كەشپەيمىن. مەن قايدا دا بولسا قاۋىپ ءتونىپ تۇر دەپ ويلامايمىن» دەدى.

ول ءسوزىنىڭ سوڭىندا: «اقش سولتۇستىك كورەياعا سوعىس اشپايدى. بىراق، سولتۇستىك كورەيانىڭ توندىرگەن قاتەرىنە لايىقتى جاۋابىن بەرەدى»، – دەپ كەسەتە ايتتى.

سول كۇنى تاڭەرتەڭ دونالد ترامپ ءوزىنىڭ Twitter پاراقشاسىندا، ءوزىنىڭ پرەزيدەنتتىك قىزمەتكە كىرىسكەن كەزدەن-اق العاش قول قويعان بۇيرىقتارىنىڭ ءبىرى اقش يادرولىق ارسەنالىن تۇتاستاي دامىتۋ باعدارلاماسى ەكەنىن ايتقان ەدى. ءتىپتى اقش ءوزىنىڭ يادرولىق قۋاتىن بۇرىن سوڭدى بولىپ كورمەگەن دەڭگەيگە دەيىن دامىتقالى وتىرعانىن دا ءسوز ەتتى. سونىمەن بىرگە ول: «مەن بۇل نارسەنى ءومىر بويى قولدانباساق ەكەن دەپ ۇمىتتەنەمىن. بىراق امەريكا قۇراما شتاتى كەز-كەلگەن ۋاقىتتا الەمدەگى ەڭ قۋاتتى مەملەكەت بولادى»، – دەدى.

“The Qazaq Times”