ەكى جىل الماتىعا اكىم بولعان باۋىرجان بايبەك نە تىندىردى؟

بۇگىن تامىزدىڭ 9 كۇنى باۋىرجان بايبەكتىڭ الماتى قالاسىنا اكىم بولىپ تاعايىندالعانىنا 2 جىل. وسىعان بايلانىستى ءبىز ونىڭ وسى ۋاقىت ارالىعىندا نە تىندىرعانىنا قىسقاشا توقتالۋدى ءجون كوردىك.

باۋىرجان بايبەك 2015 جىلى 9 تامىز كۇنى الماتى قالاسىنىڭ اكىمى بولىپ تاعايىندالعالى شاھاردا كوپ دۇنيە وزگەردى. ول كەلە سالىپ قالادا جىلدار بويى جۇمىس ىستەپ كەلگەن ترامۆاي جەلىسىن توقتاتتى. قوعامدىق كولىكتەرگە احمەتجان ەسىموۆ قويىپ كەتكەن ۆاليداتورلاردىڭ ورىنىنا قالا تۇرعىندارىنا كوپ قيىندىق اكەلگەن «وڭاي» ەلەكتروندى تولەم جۇيەسىن ەنگىزىپ، اۆتوبۋستار جۇرەتىن كولىك جولاعىن سالدى. ۇزاق جىلدار بويى قوعامدا داۋ تۋعىزىپ كەلگەن «كوك جايلاۋ» كۋررورتتىق كەشەنىن قارجىلاندىرۋ مەن سالۋدى توقتاتتى. ۇلكەن كوشەلەردىڭ بويىندا ورنالاسقان عيماراتتاردىڭ قورشاۋلارىن الدىرىپ، اۋداندىق، قالالىق، پوليتسيا بولىمشەلەرىنىڭ سىرتىنا بيىك دۋال سالدىردى. بۇل ەندى بىلتىرعى پوليتسيا بولىمشەسى مەن ۇقك عيماراتىنا جاسالعان تەررورلىق شابۋىلدان كەيىن جاسالعان قاۋىپسىزدىك شارالارىن كۇشەيتۋ ەكەندىگى بەلگىلى. بىراق وسى جەردە ايتا كەتەتىن ءبىر جايت، بىلتىر الماتىدا تەررورلىق اكت بولعاندا باۋىرجان بايبەك حالىق الدىنا شىعىپ ءبىر اۋىز ءۇن قاتقان جوق ەدى. ال ونىڭ قازىرگى «قاقپاسىز قالا» باعدارلاماسىنا قاراپ، پوليتسيادان وزگەلەرىڭ الداعى ۋاقىتتا تەررورلىق شابۋىل بولاتىن بولسا، لاڭكەستەرگە ەسىكتەرىڭدى ايقارا اشىپ قويىڭدار دەگەنگە مەڭزەيدى.

جالپى باۋىرجان بايبەك كەلگەلى ەسىموۆتىڭ كەزىندە ەسكەرىلمەگەن دۇنيەلەردىڭ كوبى قولعا الىندى. سولاردىڭ ءبىرى 31 مامىر قۋعىن-سۇرگىن قۇرباندارىن ەسكە الۋ كۇنى اشىلعان 1931-1933 جىلدارداعى اشارشىلىق قۇرباندارىنا ارنالعان ەسكەرتكىشتىڭ اشىلۋى. يمانعالي تاسماعانبەتوۆتىڭ باستاماسىمەن احمەت بايتۇرسىنوۆتىڭ مۇراجايىن مەملەكەت قامقورلىعىنا الىپ، كۇردەلى جوندەۋ جۇمىستارىن جۇرگىزۋگە بايلانىستى باستامالاردىڭ كوتەرىلۋى بولدى. ول احمەتجان ەسىموۆ اكىم بولىپ تۇرعاندا قالادا بولمايتىن كۇنى ياعني 16 جەلتوقسان تاۋەلسىزدىك كۇنىندە حالىقپەن بىرگە الاڭعا بارىپ، جەلتوقسان قۇرباندارىنا ارنالعان ەسكەرتكىشكە گۇل شوقتارىن قويدى. بۇل ونىڭ قازاق حالقىنا قاراتا جاساعان ەڭ ءبىر ءساتتى قادامدارىنىڭ ءبىرى بولدى.

بىراق الماتىدا باۋىرجان بايبەككە ەسىموۆتەن ەستەلىككە قالعان ءبىر دۇنيە وزگەرىسسىز قالدى. ول جاڭبىر جاۋسا «ۇيرەك ۇشىپ، قاز قوناتىن»، شامدارى ءبىر ءوشىپ، ءبىر جاناتىن رومانتيكالىق كوشەلەر مەن جىلىنا ەكى-ءۇش مارتە ورتەنبەسە ساۋداسى جۇرمەيتىن «باراحولكا» بازارى. ارينە الداعى ۋاقىتتا «بولاشاقتىڭ» تۇلەگى، پرەزيدەنتتىڭ سۇيىكتى ساربازدارىنىڭ ءبىرى باۋىرجان بايبەك بۇل ولقىلىقتاردىڭ ورىنىن تولتىراتىنى ءسوزسىز. بىراق ونىڭ قاي ۋاقىتتا بولاتىنىن الدا كەلە جاتقان كۇز، كوكتەمدەگى كوشە كەلبەتىنەن بايقايتىن بولامىز.

“The Qazaq Times”