ءبىر نەيمارعا نە ساتىپ الۋعا بولدى؟

فۋتبول جانكۇيەرلەرى اراسىندا تانىمال برازيليالىق فۋتبولشى نەيمار سوڭعى بىرنەشە كۇننەن بەرى الەمدەگى سپورت جاڭالىقتارىنان تۇسپەيتىن بولدى. ول فۋتبولشىلار تاريحىندا ەڭ قىمبات باعادا ساتىلعان سپورت شەبەرى بولىپ، رەكورد جاڭارتتى. «بارسەلونا»-دان نەيماردى فرانتسيانىڭ «پسج» كلۋبى 222 ملن ەۆرو تولەپ ءوز كومانداسىنا الدى. بىلايشا ايتقاندا، ءبىر نەيمار 262 ملن اقش دوللارعا نەمەسە 87 ملرد 10 ملن 200 مىڭ تەڭگەگە تۋرا كەلەدى. ەگەر ءسىز ءار كۇنى 1000 اقش دوللارىنان جيناپ وتىرساڭىز، ءبىر نەيماردى ساتىپ الۋ ءۇشىن شامامەن 718 جىل كەتكەن بولار ەدى.

BBC اگەنتتىگى «ءبىر نەيمارعا نە ساتىپ الۋعا بولادى؟» اتتى ساراپتاما جاريا ەتتى.

ۇشاق ساتىپ الا الاسىز. سىزدە ءبىر نەيمار بولسا، وندا ءسىز ونى «ساتىپ»، اقشاسىنا «بوينگ-737-700» تۇرىندەگى جولاۋشىلار ۇشاعىنان ۇشەۋ ساتىپ الا الاسىز. ءبىر ۇشاقتىڭ باعاسى قازىرگى كەزدە 84,2 ملن دوللار شاماسىندا. ال ءسىز سۋ جاڭا 737-800 ۇشاعىن ساتىپ الام دەسەڭىز دە، ونداي ۇشاقتان ەكەۋىن ءبىر نەيمار الىپ بەرە الادى جانە قالتاڭىزدا 65 ملن دوللار اقشا تاعى قالار ەدى. جەكە ۇشاق تا ساتىپ الاسىز. ەڭ كەرەمەت دەگەن جەكە ۇشاقتاردىڭ باعاسى 100 اقش دوللارىنىڭ ار جاق، بەر جاعىندا.

سوعىس ۇشاقتارىن دا ساتىپ الا الاسىز.  ەگەر ءسىزدى كينوداعى دىبىس جىلدامدىعىنان دا تەز ۇشىپ، كوز ىلەسپەس جىلدامدىقتاعى شابۋىلشى، جويعىش ۇشاقتار قىزىقتىرسا، ونىڭ قۇنىنان نەيماردى «ساتقانداعى» اقشادان ءۇش ەسەگە ارزان. اقش اۋە كۇشتەرىنىڭ «سۇرمەرگەن»  F-35 Lightning ۇشاقتارىنىڭ قۇنى 94 ملن دوللارعا تۋرا كەلەدى. ال ەگەر، F-22 Raptor جويعىش ۇشاقتارىنا قىزىقساڭىز 150 ملن دوللار، قالتاڭىزدا تاعى 112 ملن دوللار قالادى. ال، ءبىر نەيمارعا رەسەيدىڭ سۋ-24 ۇشاعىنان 10 داناسىن ساتىپ الا الاسىز.

التى شاعىن ەلدىڭ ءبىرىن ساتىپ الۋ تاڭداۋىنا قول جەتكىزە الاسىز. ەگەر سىزدە ءبىر نەيمار بولسا تۋۆالۋ، مونتسەررات، ناۋرۋ، كيريباتي، مارشالل ارالدارى جانە پالاۋ قاتارلى التى ەلدىڭ ءبىرىنىڭ ەكونوميكاسىمەن ء(ىجو) بىردەي قارجىڭىز بار بولعان بولادى.

وسى جەردە ءوز ەسەبىمىزدى دە ايتا كەتەيىك. ءبىر نەيماردىڭ قۇنى يەمەندە اشتىق كورىپ جاتقان ءار ادامعا (بۇۇ ەسەبى بويىنشا 7 ملن ادام ەڭ اۋىر اشتىق كورۋدە) 37,4 دوللار بەرىپ، 10 كۇن بويى تويا تاماقتاندىرۋعا جەتەر ەدى. نە بولماسا، 5 جاستان كىشى، ازىق جەتىسپەۋشىلىكتەن اۋىر ناۋقاستا جاتقان 2,5 ملن سابيگە 104,8 دوللاردان ەمدەۋ جانە ازىقتاندىرۋ قاراجاتىن بەرۋگە بولادى. قازىر بۇۇ گۋمانيتارلىق ىستەر كەڭسەسى الەم ەلدەرىنە اش-جالاڭاش يەمەندىكتەردى قۇتقارۋىن ءوتىنىپ، قايتا-قايتا ەسكەرتۋ جاساۋدا.

“The Qazaq Times”