ەۋروكەڭەس باسشىسى دونالد تۋسك. فوتو: يا Regnum

ەۋروكەڭەس باسشىسىن پولشا باس پروكۋراتۋراسى 8 ساعات بويى تەرگەۋگە الدى، دەپ حابارلايدى Oxu.az اقپارات كوزى.

ۆارشاۆا قالاسىندا پولشا باس پروكۋراتۋراسى 2010 جىلعى  ەل پرەزيدەنتى لەح كاچينسكي قايتىس بولعان سمولەنسك اپاتىن تەكسەرۋ بارسىندا جىبەرگەن قاتەلىكتەرى ءۇشىن، ەۋروكەڭەس باسشىسى دونالد تۋسكتى 8 ساعات بويى تەرگەگەن. Oxu.az مالىمەتىنشە،تۋسك باس پروكۋراتۋرا عيماراتىنا تاڭعى ساعات 10:00-دە كىرىپ، كەشكى ساعات 18:00-دە بىراق شىققان.

دونالد تۋسك تەرگەۋ الدىندا سويلەگەن سوزىندە: «مەنىڭ بەرگەن جاۋاپتارىمنان اپاتتى تەكسەرۋ جۇمىستارى وزگەرىپ كەتپەيدى» - دەگەن. ال پولشا پروكۋراتۋراسىنىڭ رەسمي وكىلى اركاديۋش ياراشەك: «تۋسكتىڭ اپاتتى زەرتتەۋدە جىبەرگەن باستى قاتەلىگى، ونىڭ اپاتتان كوز جۇمعان ادامداردىڭ دەنەلەرىن سوت-مەديتسينالىق ساراپتاماسىنان وتكىزبەگەندىگى جانە رەسەي اۋماعىندا جۇرگىزىلگەن زەرتتەۋ جۇىمىستارىنا پولشا تاراپىنان ەشكىمدى قاتىستىرماۋى» - دەپ مالىمدەگەن.

بۇدان بولەك پروكۋراتۋرا وكىلى سمولەنسك اپاتىنا كىنالى ادامدار ءالى جازاسىن الماعاندىعىن جانە الداعى ۋاقىتتا تەرگەۋ جۇمىستارىنا بايلانىستى تولىققاندى اقپارات بەرەتىندىكتەرىن ايتقان.

ەستەرىڭىزگە سالايىق، بۇعان دەيىن پولشا پروكۋراتۋراسى ەۋروكەڭەس باسشىسىن ءساۋىردىڭ 19-ى كۇنى تەرگەگەن بولاتىن. ول كەزدە دە تەرگەۋ جۇمىستارى 8 ساعاتقا سوزىلعان.

“The Qazaq Times”