جارىلىستان ءبىر كورىنىس. فوتو: ۆەستي.رۋ.

سارسەنبى كۇنى ابحازياداعى وق ءدارى ساقتالعان قويمادا بولعان جارىلىستان ەكى رەسەيلىك تۋريست قازا تاپقانى ءمالىم بولدى. جاراقات العان تاعى ءبىر تۋريست وق ءدارى قويماسىنا جاقىن ماڭدا تابىلعان. بۇل تۋرالى BBC ونلاين قىزمەتى حابارلايدى.

وق-ءدارى قويماسىنداعى جارىلىس. فوتو: بي بي سي

امان قالعان ءتۋريستىڭ ايتۋىنشا، رەسەيلىك ءۇش ايەل سول ماڭدا اتقا ءمىنىپ سەيىلدەپ جۇرگەن. قازا بولعان ەكەۋى سانكت-پەتەربۋرگ تۇرعىنى. دەربەس رەسپۋبليكا رەتىندە تانىلماعان ابحازيانىڭ قاۋىپسىزدىكتى ساقتاۋ مينيسترلىگىنىڭ بەرگەن مالىمەتىنە قاراعاندا، جارىلىستان 60 ادام جاراقات العان، جاراقاتى اۋىر بولعان 27 ادام اۋىرۋحاناعا جەتكىزىلگەن. ابحازيا اسكەري قويمالاردى تۇرعىندار اۋماعىنان الىس ورنالاستىرعانى تۋرالى ايتىلعان بولاتىن. الايدا، جارىلىستان زارداپ شەككەن ادامدار سانى وتە كوپ بولعان.

دەربەستىگى مويىندالماعان ابحازيا. فوتو: BBC.

2008 جىلى گرۋزيامەن كىربەڭدىك كەزىندە رەسەي ابحازيانىڭ تاۋەلسىزدىگىن تانىعانىن مالىمدەگەن ەدى. بۇدان سىرت ۆەنەسۋەلا، نيكاراگۋا، ناۋرۋ جانە ۆانۋاتۋ قاتارلى ەلدەر دە ابحازيا دەربەستىگىن مويىندادى. بۇۇ ءالى دە ابحازيانى گرۋزيا ايماعى رەتىندە ەسەپتەپ كەلەدى. تبيليسي جاعى رەسەيدى بۇل ايماقتى وڭتۇستىك وسەتيا سەكىلدى وقشاۋلاپ الدى دەپ ايىپتايدى.

بۇل اراداعى جارىلىستان رەسەيلىكتەردىڭ قازا بولۋىنا بايلانىستى، ماسكەۋ جاق قانداي قادامداردى جاساعالى وتىرعانى انىق ەمەس. سولاي بولا تۇرسا دا قارا تەڭىزدىڭ شىعىس جاعالاۋىندا الدەبىر تۇراقسىزدىققا مۇرىندىق بولماسىنا كىم كەپىل؟!

“The Qazaq Times”