پاكستان باسشىسى تاقتان تايدىرىلدى – قىتايدىڭ وڭىردەگى ۇپايى كەمىدى

28 شىلدە كۇنى پاكستان جوعارى سوتى سىبايلاس جەمقورلىق ايىبىمەن ەلدىڭ پرەمەر-ءمينيسترى ناۆاز ءشاريفتىڭ وكىلەتتىلىگىن توقتاتتى. الايدا، ناۆاز شاريف بۇل شەشىمگە مويىنسال بولماعان بەتى، پرەمەر-مينيستر كەڭسەسىن بوساتىپ بەردى. بۇل ءۇندىستان، قىتاي جانە پاكستان اراسىندا قارىم-قاتىناستاردىڭ ەڭ ءبىر كىلتەڭدى كەزەڭىندە ورىن العان ساياسي وزگەرىس قىتاي بيلىگىن الاڭداتىپ وتىر. بۇل تۋرالى سول ەلدىڭ «شينلاڭ» اقپاراتتىق اگەنتتىگىنىڭ رەسمي سايتى حابارلاپ وتىر.

ناۆاز ءشاريفتىڭ داۋلى ءىسى وتكەن جىلى باستالعان بولاتىن. وعان جانە ونىڭ وتباسى مۇشەلەرىنە سىبايلاس جەمقورلىقپەن اينالىستى دەگەن ايىپ تاعىلىپ، تەرگەۋ كوميسسياسى تەكسەرۋدى باستاعان ەدى. بيىل 10 شىلدە كۇنى تەرگەۋ توبى قورىتىندى شىعارىپ، جوعارى سوت ءىستى قابىلداپ العان. 17 شىلدە كۇنىنەن باستاپ، جوعارى سوت ناۆاز ءشاريفتىڭ ۇستىنەن سىبايلاس جەمقورلىق ءىسىن قاراي باستادى. 28 شىلدە كۇنى جوعارى سوت شەشىمىمەن پاكستان پرەمەر-ءمينيسترى تاقتان تايدىرىلدى.

سوت تەرگەۋ توبىنىڭ مالىمەتىنە قاراعاندا، ناۆاز ءشاريفتىڭ وتباسى مۇشەلەرىنىڭ بيزنەستەن تاپقان تابىسى ولارعا تاۋەلدى بارلىق مۇلىكتەردى دالەلدەۋگە جەتكىلىكسىز دەپ تاپقان. سونداي-اق، ۇل-قىزدارىنا جالعان قۇجاتتارعا قول قويعان دەگەن ايىبىمەن بىرگە  لوندوندا ەليتالىق پاتەرلەر مەنشىك قۇقىعىن جاسىرۋ دەگەن ايىپتار تاعىلدى.

ناتيجەسىندە، ناۆاز شاريف ءۇشىنشى وكىلەتتى مەرزىمى اياقتالماي جاتىپ تاقتان تايدىرىلدى. پاكستانداعى بۇل ساياسي وزگەرىستىڭ بەيجىڭدى الاڭداتاتىن ءجونى بار. ءۇندىستان مەن قىتاي اراسى سالقىنداپ، شەكارالىق داۋى ءورشىپ تۇرعان كەزدە، پاكستانداعى ساياسي وزگەرىس قىتايعا ءتيىمسىز. كوپتەن بەرى قىتايدىڭ سەنىمدى كورشىسى سانالىپ كەلگەن پاكستان، «ءبىر بەلدەۋ، ءبىر جول» جوباسىن قولداۋشى سەرىگى ەدى. قىتايدىڭ وڭتۇستىك-باتىسىنداعى ستراتەگيالىق ماڭىزى وداقتاسى. پاكستان بيلىگىندەگى بۇل كەلەڭسىزدىك، قىتايدىڭ ۇندىستانمەن بولعان تەكەتىرەسىندە ۇپايىن كەمىتە تۇسەدى.

“The Qazaq Times”