ماسكەۋ اقش ديپلوماتيالىق قىزمەتكەرلەرىن قىسقارتا باستادى

كرەمل اقش جاڭا سانكتسياسى بەكىتىلە سالىسىمەن، سانكتسيا اتقارىلماي جاتىپ، قارسى رەاكتسياسىن كورسەتە باستادى. رەسەي سىرتقى ىستەر مينيسترلىگى حابارلاما جاريالاپ، ەل ىشىندەگى اقش ديپلوماتتارىنا ماسكەۋدەگى جانە رەسەيدىڭ بىرنەشە قالاسىنداعى قويمالاردى پايدالانۋعا تيىم سالدى. سونىمەن بىرگە رەسەيدە تۇراتىن اقش ديپلوماتتار سانىن قىسقارتۋ تۋرالى ۇسىنىس تاستادى. بۇل تۋرالى بي-بي-سي ارناسىنىڭ اقپاراتتىق سايتى جازىپ وتىر.

ەگەر اقش تارابى رەسەيگە باعىتتالعان جاڭا سانكتسيا جوباسىن بەكىتپەگەندە، ماسكەۋ جاق مۇنداي مىنەز كورسەتپەسى انىق ەدى. دەگەنمەن كرەمل ءوزىنىڭ شەكتەۋ شارالارىن اقش سانكتسياسىنىڭ لەبى جەتىپ ۇلگەرمەي جاتىپ باستاپ كەتتى. كرەملدىڭ مۇنىسى «قورىققان بۇرىن قول جۇمسايدى»-نىڭ ءوزى بولسا كەرەك.

رەسەي ءسىم بەكىتكەن شەكتەۋ شاراسى بويىنشا، 1 قىركۇيەككە دەيىن ماسكەۋدەگى، سانكت-پەتەربۋرگ، ۆلاديۆوستوك قاتارلى قالالارداعى اقش ەلشىلىكتەرىندەگى ديپلوماتيالىق جانە تەحنيكالىق قىزمەتكەرلەرىنىڭ سانى، رەسەيدىڭ اقش-تا تۇراتىن قىزمەتكەرلەرىنىڭ سانىمەن بىردەي بولۋى كەرەك دەلىنگەن. بۇل ۇسىنىستى قابىلدايتىن بولسا، اقش رەسەيدەگى قىزمەتكەرلەرىنەن 455 ادامدى قىسقارتۋعا ءماجبۇر بولادى. كرەملدىڭ بۇل قادامى اقش جاڭا سانكتسياسىنىڭ رەسەيدى الاڭداتىپ وتىرعانىن تۇسىندىرەدى.

“The Qazaq Times”