سۆيفت: ترامپ قىتايعا يادرولىق شابۋىل بۇيرىعىن بەرسە، تاباندا ورىندايمىن

اقش اسكەري-تەڭىز تىنىق مۇحيت فلوتى كومانديرى ءسۆيفتتىڭ بەيسەنبى كۇنى سويلەگەن ءسوزى قىتاي مەن شىعىس ازيانى ءدۇر سىلكىندىردى. ول سوزىندە: «ەگەر، پرەزيدەنت ترامپ كەلەر اپتادا قىتايعا قاراتا يادرولىق شابۋىلدى ىسكە قوسۋ بۇيرىعىن بەرەتىن بولسا، مەن تاباندا بۇيرىقتى اتقارامىن»، – دەدى. بۇل تۋرالى قىتايدىڭ «شينلاڭ» اقپاراتتاق اگەنتتىگىنىڭ رەسمي سايتى حابارلاپ وتىر.

سۆيفت بۇل پىكىرىن كەشەگى كۇنى اۆستراليالىق ۇلتتىق ۋنيۆەرسيتەتىندە وتكەن قاۋىپسىزدىك كونفەرەنتسياسىندا ايتىپ ءوتتى. كونفەرەنتسياعا قاتىسۋشىلاردىڭ ءبىرى اقش اسكەري-تەڭىز كۇشتەرىنىڭ كومانديرىنەن: «ەگەر سىزگە پرەزيدەنت ترامپ قىتايعا يادرولىق شابۋىلدى ىسكە قوسۋ تۋرالى بۇيرىق بەرسە، ءسىز بۇل بۇيرىقتى اتقاراسىز با؟» – دەپ سۇرادى. سۆيفت ويلانباستان: «ارينە اتقارامىن، – دەپ جاۋاپ بەردى، ول جانە: ءار ءبىر امەريكا جاۋىنگەرى انت بەرگەندە ءۇش ۇلكەن ارميانىڭ باس قولباسشىسى رەتىندە پرەزيدەنتكە باعىنامىن دەپ سەرت بەرەدى. ەگەر، پرەزيدەنت قىتايعا يادرولىق شابۋىلدى ىسكە قوس دەسە، مەن تاباندا بۇل بۇيرىقتى ورىندايمىن»، – دەدى.

ول ءوزى ءسوزىن تۇسىندىرە كەلىپ: «بۇل امەريكالىق دەموكراتيانىڭ نەگىزى بولىپ تابىلادى. اقش ارمياسى كەز-كەلگەن ۋاقىتتا امەريكالىقتاردىڭ باقىلاۋىندا جانە ادالدىقتان اۋىتقىمايدى. ولاي بولماعاندا وتە ۇلكەن قايشىلىقتار ورىن الادى»، – دەدى.

Associated Press-ءتىڭ حابارىندا، اقش پەن اۆستراليا بىرلەسكەن كولەمدى اسكەري وقۋ-جاتتىعۋلارى تاياۋدا عانا سوڭىنا شىقتى. بۇل اسكەري وقۋ-جاتتىعۋعا ەكى تاراپتان 33 مىڭ جاۋىنگەر، 36 اسكەري كەمە جانە 220 اسكەري ۇشاق قاتىستىرىلدى.

قىتاي ساراپشىلارىنىڭ بۇعان قاراتقان پىكىرىنە توقتالاتىن بولساق، ولار ءسۆيفتتىڭ «پرەزيدەنتكە ادالدىق»، «جاۋىنگەرلىك رۋح» دەگەنىنىڭ ءبارى ساياسي قىزىل سوزدەر عانا دەپ قارايدى. ول ادال بولسىن بولماسىن، بۇيرىقتان جالتارسا، قىزمەتىنەن الىنىپ، ونىڭ ورنىنا پرەزيدەنت بۇيرىعىنا باعىناتىن ءبىر ادامنىڭ تاعايىندالاتىنىن جاقسى بىلەدى. قىتاي ساراپشىلارى: «ەگەر مۇنداي بۇيرىق قىتاي ازاتتاق ارمياسىنىڭ كومانديرىنە قويىلار بولسا ول دا ءبىر اۋىز كەسىمدى جاۋاپ بەرە الادى»، – دەدى.

اتالعان سايتتىڭ جازۋىنشا، قىتاي-اقش قارىم-قاتىناسى قازىر وڭىردەگى ەڭ ماڭىزدى ەل ارالىق قارىم-قاتىناس بولىپ سانالادى ەكەن. بۇل قارىم-قاتىناستىڭ سەزىمتالدىعى سونشا، بىرەر ادامنىڭ وتكىزگەن قاتەلىكتەرىن ۇكىمەت جابىلا جۋىپ-شايىپ، تازارتۋمەن كەلەدى. ال، ءۇشىنشى ءبىر ەلدىڭ قىتاي مەن اقش اراسىنداعى يادرولىق سوعىستىڭ تۋىلۋىن ەلەستەتۋ جانە ونى اقش اسكەري لاۋازىمدىسىنان سۇراۋى بارىپ تۇرعان ارانداتۋ سانالادى ەكەن. قىتايلىق ساراپشىلار پىكىرىنشە، «ترامپ ەسى اۋىسقان جاعدايدان كەيىن عانا مۇنداي يادرولىق شابۋىل بۇيرىعىن بەرەدى» دەپ قارايدى.

“The Qazaq Times”