اقش رەسەيگە قارسى جاڭا سانكتسيالار ەنگىزەدى

اقش كونگرەسىندەگى رەسپۋبليكاندىقتار مەن دەموكراتتار رەسەيگە قارسى جاڭا سانكتسيالار ەنگىزۋ تۋرالى زاڭ جوباسىن ماقۇلداپ، دونالد ترامپتىڭ قول قويۋىنا  جىبەردى. بۇل تۋرالى BBC اقپاراتتىق قىزمەتى جازادى.

ەستەرىڭىزگە سالا كەتەيىك، وسىدان بۇرىن رەسەي اقش-تا وتكەن پرەزيدەنت سايلاۋىنا ارالاسىپ، ونىڭ قورىتىندىسىن وزگەرتتى دەپ ايىپتالعان بولاتىن. ەنگىزىلىپ وتىرعان جاڭا سانكتسيالار رەسەيدىڭ وسى استىرتىن ارەكەتىنە جاۋاپ رەتىندە قولعا الىنىپ وتىر. رەسەي بۇل ايىپتاۋلاردى تولىقتاي تەرىسكە شىعاردى، ال اقش-تا دونالد ترامپتىڭ جەڭىسكە جەتۋىنە ماسكەۋدىڭ قاتىسى بار-جوعى تەكسەرىلىپ جاتىر.

جاڭا قۇجاتقا سايكەس، اقش-تىڭ رەسەيگە قىرىمدى اننەكتسيالاعانى ءۇشىن سالعان بۇرىنعى سانكتسيالارى قاتاڭداتىلادى دەپ كۇتىلۋدە. رەسەيگە قارسى قولدانىلاتىن جاڭا شەكتەۋلەر، يران مەن سولتۇستىك كورەياعا قارسى ورىندالاتىن قاتاڭ شارالاردىڭ اياسىندا جۇزەگە اسادى. CNN جۋرناليستەرى ۆلاديمير ءپۋتيننىڭ ءباسپاسوز حاتشىسى دميتري پەسكوۆتان جاڭا قۇجاتقا قاتىستى ويىن سۇراعاندا، ول "وتە نەگاتيۆتى پىكىردەمىن" دەپ، قىسقا قايىردى.

دونالد ترامپ بۇل قۇجاتقا قول قويۋدان باس تارتاتىن ۆەتو قۇقىعىنا يە. دەگەنمەن اقش پرەزيدەنتىنىڭ رەسەيدى قولداپ، ارەكەت ەتۋى ونىڭ سايلاۋداعى جەڭىسىنە ماسكەۋدىڭ قوسقان ۇلەسى زور دەگەن كۇدىكتى ودان ءارى كۇشەيتە تۇسەرى ءسوزسىز.

“The Qazaq Times”