اقش اۋە كۇشتەرى اۋعانستان پوليتسەيلەرىن ءولتىردى

اقش قورعانىس دەپارتامەنتىنىڭ ەكى كۇن بۇرىن جاريالاعان حابارىندا، اۋعانستانداعى اقش اۋە كۇشتەرى ءبىر رەتكى اۋە اسكەري وپەراتسياسى كەزىندە جەرگىلىكتى قاۋىپسىزدىك قىزمەتكەرلەرىن جازاتايىم وققا ۇشقانى تۋرالى ايتتى. اتالعان دەپارتامەنتتىڭ حابارىنا قاراعاندا، اۋە قيمىلى اۋعانستاننىڭ وڭتۇستىگىندەگى گيلمەند پروۆينتسياسىندا بولعان. جەرگىلىكتى بيلىكتىڭ بەرگەن مالىمەتىندە اقش اۋە كۇشتەرى جاعىنان ون نەشە اۋعانستاندىق قاۋىپسىزدىك قىزمەتكەرى جازاتايىم قازا تاپقان. بۇل تۋرالى «شينحۋا» اگەنتتىگىنىڭ رەسمي سايتى جازىپ وتىر.

Reuters اگەنتتىگى وسى وقيعا تۋرالى پىكىرىندە: "اۋعانستانداعى اقش اسكەري كۇشتەرى جونىنەن الىپ قاراعاندا، بۇل جازاتايىم وقيعا ەكى ەل قارۋلى كۇشتەرى اراسىندا سەنىمسىزدىك تۋعىزادى"دەدى. وسىعان قاتىستى مالىمەتتەردە سول كۇنى اقش كۇشتەرى تاليبان تەررورلىق توبىنا سوققى بەرۋ ماقساتىندا بارعان. اۋعانستان قاۋىپسىزدىك كۇشتەرىنىڭ كومەك سۇراۋىمەن بەلگىسىز ءبىر عيماراتتى بومبىلاعان. شابۋىل كەزىندە جەرگىلىكتى ون نەشە پوليتسيا قازا بولعان. قازا بولعان اۋعان قاۋىپسىزدىك قىزمەتكەرلەرىنىڭ سانى ءالى دە ناقتى ەمەس.

وسىمەن ءبىر ۋاقىتتا رەسەي پرەزيدەنتىنىڭ اۋعانستان ىستەرى جونىندەگى وكىلى حابارلاما جاريالاپ: «اقش اسكەري كۇشتەرى اتالعان ەلدە تەرروريزممەن كۇرەسىپ وتىرعان جوق»، - دەپ مالىمدەگەن. كرەمل تارابى ەگەر اقش اۋعانستانداعى لاڭكەستىك توپتارعا سوققى بەرمەيتىن بولسا، وندا رەسەي كۇشتەرى بۇعان قاراتا ارەكەت قولداناتىن بولادى، سەبەبى، اۋعانستان ءىسى رەسەيدىڭ قاۋىپسىزدىگى مەن ۇزاق ۋاقىت بولاشاعىنا تىكەلەي قاتىستى دەپ حابارلاما تاراتتى.

“The Qazaq Times”