ەكۆادور وپەك-ءتىڭ مۇناي كولەمىن قىسقارتۋ تۋرالى كەلىسىمىنەن باس تارتادى

ەكۆادور ەلدەگى قارجىلىق قيىندىقتارعا بايلانىستى وپەك-ءتىڭ تاۋلىگىنە وندىرىلەتىن مۇناي كولەمىن  قىسقارتۋ تۋرالى كەلىسىمىن ورىنداي المايدى. كەلىسىمگە سايكەس، مەملەكەت ءوندىرىستى تاۋلىگىنە 26 مىڭ باررەلگە قىسقارتۋ قاجەت. بۇل تۋرالى ۇكىمەت حابارلاماسىندا ايتىلعان. 

ەلدىڭ مۇناي ءمينيسترى كارلوس پەرەستىڭ سوزىنشە، ەكۆادور وسى ۋاقىتقا دەيىن كولەمدى تەك 60 پايىزعا عانا قىسقارتقان. قازىرگى كەزدە ەلدە ءوندىرىلىپ جاتقان شيكىزات كولەمى تاۋلىگىنە 545 مىڭ باررەلدى قۇرايدى.

ۇكىمەت وكىلدەرىنىڭ سوزىنشە، وسى جىلى ەكۆادوردىڭ بيۋدجەت تاپشىلىعى جالپى ىشكى ءونىمنىڭ 7,5 پايىزىن قۇراۋى مۇمكىن. سەبەبى ەل مۇناي نارىعىنداعى تۇراقسىزدىققا بايلانىستى زارداپ شەگىپ وتىر.

"وكىنىشكە وراي، قازىرگى كەزدە ءبىز ءوندىرىستى 26 مىڭ باررەلگە ەمەس، 16 مىڭعا عانا قىسقارتا الىپ وتىرمىز. ەلدەگى قيىندىقتارعا بايلانىستى وزىمىزگە ۇسىنىلعان كۆوتانى ورىنداپ جاتقان جوقپىز", - دەدى كارلوس پەرەس. 

ايتا كەتەيىك، وپەك كەلىسىمىنە قاتىستى قازاقستاننىڭ دا پوزيتسياسى تۇراقسىز. قر ەنەرگەتيكا مينيسترلىگى بىردە "قازاقستان مۇناي كولەمىن قىسقارتۋعا قاتىستى وپەك-پەن بولعان كەلىسىم مەرزىمىن ودان ءارى ۇزارتۋعا دايىن ەمەس" دەسە ەندى بىردە وپەك پەن وعان مۇشە ەمەس ەلدەردىڭ مۇناي كولەمىن قىسقارتۋ مەرزىمىن ۇزارتۋ تۋرالى شەشىمىن قولدايدى" دەگەن ءبىر-بىرىنە قارسى پىكىر ايتادى.

 “The Qazaq Times”