قازاقستان رەسپۋبليكاسىنىڭ ۇلتتىق بانكى بازالىق مولشەرلەمەنى +/-1%-دىق دالىزبەن 10,5% دەڭگەيىندە ساقتاۋ تۋرالى شەشىم قابىلدادى. بۇل تۋرالى باس بانكتىڭ ءباسپاسوز قىزمەتى حابارلادى.
رەتتەۋشىنىڭ مالىمەتىنشە، جىلدىق ينفلياتسيا دەڭگەيى ۇلتتىق بانكتىڭ بولجامدى باعالارىمەن سايكەس كەلەدى جانە نىسانالى ءدالىز شەڭبەرىندە قالىپ وتىر، ينفلياتسيالىق كۇتۋلەر تۇراقتى دەڭگەيدە قالىپتاسۋدا.
"ينفلياتسيالىق تاۋەكەلدەر جەكەلەگەن تاۋار نارىقتارىندا تۋىندايتىن ۇسىنىس فاكتورلارى جانە سىرتقى پارامەترلەردىڭ ەكونوميكانىڭ دامۋىنىڭ بازالىق ستسەناريىنەن اۋىتقۋى تاراپىنان بولۋى مۇمكىن. سوعان قاراماستان، بولجامدى ينفلياتسيانىڭ ورتا مەرزىمدى كەزەڭدەگى باياۋلاۋ تراەكتورياسى ناقتى پايىزدىق بازالىق مولشەرلەمەنىڭ ەكونوميكانىڭ الەۋەتتى قارقىنىنا سايكەس كەلۋىنە بايلانىستى قىسقا مەرزىمدى پەرسپەكتيۆادا دا، الداعى 12-18 ايدا دا بازالىق مولشەرلەمەنىڭ تومەندەۋ ىقتيمالدىعىن ارتتىرادى", - دەلىنگەن ءباسپاسوز حابارلاماسىندا.
ءباسپاسوز قىزمەتىنىڭ مالىمەتىنشە، 2017 جىلعى ماۋسىمدا جىلدىق ينفلياتسيا 7,5%-دى قۇرادى جانە ۇلتتىق بانكتىڭ نىسانالى ءدالىزى شەڭبەرىندە (6-8%) ساقتالۋدا. ينفلياتسيانىڭ اعىمداعى جىلعى 1-جارتىجىلدىقتا (3,7%) 2016 جىلعى 1-جارتىجىلدىقپەن (4,6%) سالىستىرعاندا ەداۋىر تومەن بولعان.
ازىق-تۇلىك نارىعىنىڭ جەكەلەگەن سەگمەنتتەرىندەگى احۋال سوڭعى ايلاردىڭ قىسقا مەرزىمدى ينفلياتسيالىق تاۋەكەلى بولدى، الايدا جاڭا ءونىم كەزەڭىنىڭ باستالۋى ازىق-تۇلىك باعالارىنىڭ جالپى سەرپىنىندەگى جاعىمسىز ۇردىستەردى رەتتەدى.
حالىقتىڭ ينفلياتسيالىق كۇتۋلەرى 2017 جىلدىڭ باسىنان بەرى تۇراقتىلىقتى ساقتاپ وتىر. ماۋسىمدا ينفلياتسيانىڭ ءبىر جىل العا بەرىلگەن ساندىق باعاسى 6,4%-دى قۇرادى جانە ناقتى ينفلياتسيا دەڭگەيىنەن تومەن، سونداي-اق ينفلياتسيا ءدالىزىنىڭ 2018 جىلعا ارنالعان شەگىندە قالىپ وتىر. ماۋسىم ايىندا جاسالعان پىكىرتەرىم ناتيجەلەرى قابىلداناتىن جىلدىق ينفلياتسيا مەن حالىقتىڭ ءبىر جىل العا ارنالعان كۇتۋلەرى ازداپ تومەندەگەنىن كورسەتتى.
سىرتقى تاۋار نارىقتارىنداعى احۋال قۇبىلمالىلىعىمەن سيپاتتالادى. مۇناي باعاسىنىڭ ءبىر باررەل ءۇشىن 50 دوللاردان تومەن دەڭگەيدە قالىپتاسۋى جانە مامىردا-ماۋسىمدا الەمدىك ازىق-تۇلىك نارىقتارىنداعى باعا يندەكسىنىڭ ءوسۋىنىڭ، نەگىزىنەن، ءسۇت ونىمدەرى مەن ءداندى-داقىلداردىڭ قىمباتتاۋى سالدارىنان جىلدامداۋى ينفلياتسيالىق ايانىڭ كۇشەيۋىنە اكەپ سوعۋى مۇمكىن.
سالىمشىلاردىڭ ۆاليۋتالىق باسىمدىقتارى تەڭگەمەن اكتيۆتەردىڭ پايداسىنا ساقتالۋدا. ماۋسىمنىڭ الدىن الا دەرەكتەرى بويىنشا تەڭگەمەن دەپوزيتتەر ۇلەسىنىڭ ۆاليۋتالىق دەپوزيتتەر ۇلەسىنەن اسىپ كەتۋى ودان ءارى جالعاسۋدا. تەڭگەمەن كرەديتتەر ۇلەسىنىڭ ءوسۋى دە بايقالۋدا. بۇل رەتتە
كرەديتتىك رەسۋرستارعا دەگەن سۇرانىس تۇراقتى بولىپ قالۋدا جانە مولشەرلەمەلەردىڭ بىرتىندەپ تومەندەۋىمەن قاتار جۇرۋدە. كرەديتتەۋدىڭ قىسقا مەرزىمدى سەرپىنى بانك سەكتورىنداعى شوعىرلانۋ پروتسەستەرىمەن شەكتەلۋدە.
بازالىق مولشەرلەمە بويىنشا كەزەكتى شەشىم 2017 جىلعى 21 تامىزدا استانا ۋاقىتىمەن ساعات 17:00-دە جاريالانادى
استانادا قالعان جاڭاوزەندىك جۇمىسسىزدار "قازمۇنايگاز" كەلىسسوزدى توقتاتىپ تاستادى دەيدى
فبر پەنتاگوننىڭ قۇپيا قۇجاتتارىنىڭ جاريالانۋىنا قاتىسى بار كۇدىكتىنى قامادى
بىشكەكتە كاسىپكەرلەر جاڭا سالىق ەرەجەلەرىنە قارسى اكتسيا وتكىزدى
نازارباەۆ "قۇرمەتتى سەناتور" اتاعىنان ايىرىلدى
موڭعوليا استاناسىندا جاپپاي نارازىلىق شەرۋلەرى ءوتتى
ەكىباستۇزدا جىلۋ جەلىسىندەگى اقاۋعا "ستانتسيا قىزمەتكەرىنىڭ قاتەلىگى" سەبەپ بولعانى ايتىلدى